Kuupiup Pallep isumaqatigiissusiaa misissussavaa
Isumaqatigiissusioqqaariarlunili kingunissai kingorna misissussallugit pissusissamisoorpa? Naalakkersuisut siulittaasuat ima akivoq:
- Naalakkersuisut aalajangiisartullu allat aalajangiinnginnerminni tamatigut soorunami pisussaaffigaat kingunissat misissuiffigissallugit. Ataqatigiissaarinissaq Naalakkersuisut siulittaasuattut suliassarivara, misigisimagumalu suliaq nalilersuiffigineqqittariaqartoq pisussaaffigivara taamatut kissaateqassallunga, Naalakkersuisunullu saqqummiunneqarnissaa aamma aalajangissallugu. Suliami uani taamaaliorpunga, sapaatillu-akunnerata massuma ingerlanerani eqqartoqqissavarput, Kuupik Kleist oqarpoq.
Air Icelandimik isumaqatigiissutip suliassaqarfinnut allanut ajortumik kinguneqannginnissaa naalakkersuisut isumagissagaat, Kuupik Kleistip erseqqissaatigaa, Namminersorlutillu Oqartussat Air Greenlandimik piginneqataasutut ingerlatseqatigiiffiup ingerlanneqarneranut ajortumik kinguneqannginnissaa isumagissagaat oqaatigalugu.
SIK-p aamma Kangerlussuarmi nunaqarfup aqutsisuisa Air Icelandimik isumaqatigiissut isornartorsiorpaat, SIK-mi ilaasortat Kangerlussuarmilu innuttaasut eqqugaanissaat ilaatigut aarleqqutigineqarluni.
Taamaattoq isumaqatigiissutip allanngortinneqarsinnaanissaa, Kuupik Kleistip ilimaginngilaa:
- Allanngortinneqartariaqarnissaa takorloorsinnaanngilara, suulluunniilli nalilersuiffigineqartariaqarput, sipaartariaqarnittalu saniatigut Nunarput ataatsimut isigalugu Nunatta karsiata aningaasartuutaasa allat aamma noqinnissaat pisussaaffigivarput. Aningaasarsiornikkut pissutsit eqqarsaatigalugit pisortat ingerlatsinerat akisuallaarujussuaqaaq. Taamaattumik sutigut sipaaruteqarsinnaanerluta tamatigut ullut tamaasa eqqumaffigisussaavarput, Naalakkersuisut siulittaasuat Kuupik Kleist oqarpoq.
