Kuupiup aapparmi ingerlaannarnissaa eqqarsaatigaa

Kuupik Kleistip inooqataata Ove Karl Berthelsenillu nuliata ujaqqanik pinnersaatissanik ujarlertut Greengemsip siulersuisuinit ilaajunnaarnissaat eqqarsaatinut ilaapput.

- Pisimasut pineqarnittalu ilungersunarnera pissutigalugu isumaqatigiippugut, qanorluunniit iliuusissat qanoq ikkaluarpata, taamaaliornissamut piareersimalluta, eqqartorneqarnitta nuanninngitsut qaangerneqarnissaat siunertaralugu. Aammalu Nunatta naalakkersuinikkut isigineqarnera innarlerneqaqqunagu, Kuupik Kleist oqarpoq.

Iliuutsinut ilaasinnaanerpa, piginneqatigiiffimmit pineqartumit tunuarnissaq?

- Aappagut piginneqatigiiffimmut tunngatillugu pisarialimmik arlaatigut iliuuseqassagunik piareersimapput, Kuupik Kleist oqarpoq.

Tassa taama nalunaarpoq, ilaatigut Siumup siulittaasuanit, Aleqa Hammondimit, pissaanermik atornerluinermut kammalaatersornermullu eqqaanartumik pasillerneqareerluni.

Tassami naalakkersuisut siulittaasuata aappaa, Aviâja Vandersee aatsitassanullu naalakkersuisup Ove Karl Berthelsenip nulia, Grethe Kramer Berthelsen, ujaqqanik pinnersaasiassanik piiaaniarluni piginneqatigiiffimmi, GreenGems-imi siulersuisiuni ilaasortaapput.

Piginneqatigiiffik pinnersaasiassanik smaragdinik ujarlerninnissamut Naalakkersuisunit akuerineqarnikuuvoq.

Kisianni Kuupik Kleistip pasilliutit ilumuunnginerarpai.

- Kinaassutsiminnik nalunaarusunngitsut oqaluttuarlutik paasissutissanik eqqunngitsunik tunniussuinissaat pinaveersaartinneqarsinnaanngilaq. Sukkanerpaamik qulaajaasoqassasoq, uagut kissaatigaarput, Nunatta naalakkersuinikkut isigineqarnerata innarlerneqannginnissaa siunertaralugu.

Kuupik Kleistillu aamma nammineq naalakkersuisunngunngikkallaramili pisinnaatitaaffeqarnini eqqaasitsissutigaa:

- Soorunalimi illersorneqartariaqarput piginnaatitaaffiit nalinginnaasut, inunnut allanut atuuttut, Kuupik Kleist oqarpoq.

Kisianni tassa nuannarinngikkaluaraaluunniit, kingunerusinnaavoq, ilaquttamik piginneqatigiiffimmit GreenGemsimiit tunuarnissaat. Naalakkersuisut isigineqarnerat ilaquttat piginnaatitaaffiinit pingaarneruvoq.

Taamaammat Kukkunersiuinermik Ataatsimiititaliap misissuinissaanik IA-p suliakkiuteqarnera Kuupik Kleitsip nuannaarutigaa.

- Politikerit ataasiakkaarluta nalilersussanngilarput, suna ilumoortuunersoq imaluunniit ilumoortuunnginnersoq. Una ataatsimiititaliamit misissorneqarniarli, taava misissuinini naammassippagu, Inatsisartut ilisimasaqarfigilissavaat, suna eqqortuunersoq, Inuit Ataqatigiit politikikkut oqaaseqartartua, Aqqaluaq B. Egede oqarpoq.

Suliakkiuteqarneq pissuteqarpoq Siumut, Aqqaluaq B. Egedep oqarneratut, suli suliakkiisimanngimmat, naak arlaleriarlutik taamaaliorniarlutik oqaraluarlutik:

- Tassani suliarineqarnissaa qangali utaqqimisaarsimagaluarparput, Siumukkut neriorsuuteqarmata, suliassaq una Inatsisartut Kukkunersiuinermut Ataatsimiititaliaanut ingerlanniarlugu. Tamannalu pisimanngilaq, Aqqaluaq B. Egede oqarpoq.