Kuupik sila pillugu isumaqatiginniariartulerpoq

Naalakkersuisut siulittaasuat Kuupik Kleist, IA, qaammatip uumap naanerani Københavniliassaaq, Kalaallit Nunaata nunarsuarmi nunat silap pissusaa pillugu isumaqatigiissutissaannut atatillugit, nunatta pisinnaatitaaffissai Danmarkimut isumaqatiginninniutigiartorlugit, aviisi Sermitsiaq allappoq.
Allattoq Jaaku Lyberth
oktobarip 23-at 2009 09:23

Danskit silap pissusaanut nukissiornermullu ministeriata, Connie Hedegaardip Naalakkersuisut siulittaasuata Kuupik Kleistip oktobarip ulluisa 26-anniit 30-annut isumaqatiginiassavaa. Piffissami tassani Inatsisartut ataatsimissanngillat, nunat avannarliit siunnersuisoqatigiiffiat Nordisk Råd Stockholmimi ataatsimiittussammaat.

Kalaallit Nunaata Danmarkillu akornanni silap pissusaa pillugu paaseqatigiissuteqassappata periarfissaq kingullinngulivippoq, paaseqatigiinnissarli ajornaatsuussanngilaq.

Kalaallit Nunaata kissaatigigaa, suliffissuaqarnikkut ineriartornissaq qularnaarumallugu CO2- mik aniatitsinerup qaffanneqarnissaa, illuatungaatigullu Danmarkip silap pissusaata allanngoriartornera pillugu decembarimi ataatsimeersuarnissarsuarmut, COP15-imut, qaaqqusisuunissani pissutigalugu immikkut ittumik akuersissuteqarnissaq sanngiillisaataasussaasoq allaaserineqarpoq.

Silap pissusaa pillugu Naalagaaffiit Peqatigiit ataatsimiitisinissaat Københavni pissaaq decemberip ulluisa arfineq aappaanniit 18-at ilanngullugu.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq