Kuupik: Oqallinneq avaanngunarpoq

Naalakkersuisut siulittaasua Kuupik Kleist, ullumi inuit ataasiakkaat pillugu oqallittoqalermat qitiulersoq, taama sakkortutigisumik oqarpoq.

- Ullorpassuit eqqarsaatigigaani isumaqarpunga, oqallinneq avaanngunartoq. Massakkut Inatsisartut ataatsimiinneranni apeqqutaajunnaartutut isikkoqarpoq, suna oqaluuserineqarnersoq, Kuupik Kleist ullumi oqarpoq.

Taanna sioqqullugu Inatsisartuni oqallinneq sakkortuvoq. Kommunit aqunneqarneqarnerat pillugu inatsissaq oqallisigineqarpoq. Ingammillu Naalakkersuisut siulittaasuata Kommunit Nakkutilliisoqarfianni siulittaasuujunnaarnissaanut siunersuut oqallitsitsilerpoq.

Siunnersuutigineqarpoq, tassani siulittaaasoq inatsisilerituutut ilinniarsimasuussasoq, illua tungiliuttullu tamanna isumaqartippaat, Kuupik Kleistip suliassamik naammassisinnaanera naalakkersuisuutitaqartut upperinngikkaat:

- Paasivara, Naalakkersuisut siulittaasuat, Kuupik Kleist, suliaminut naammassimanngitsoq, Siumumeersoq Kristian Jeremiassen Inatsisartut ataatsimiittarfianni oqarpoq.

Kisianni Inuit Ataqatigiinneersup Kaali Olsenip tamanna illua tungilerpaa:

- Kuupik Kleist pisortatut pikkorissorujussuartut piginnaasalissuartullu isigaarput. Tatigilluinnarlugulu ataqqilluinnarparput, Kaali Olsen oqarpoq, nangillunilu:

- Uani kingumut oqallinermik sangutitsineruvoq. Kingumut oqallinermik puussaarisoqarpoq, tamannalu akueriuminaatsorujussuuvoq.

Kaali Olsen partiimi siulittaasuminit taperserneqarpoq. Taassumalu aamma Siumup isornartorsiutai paasiuminaatsippai.

- Kommunit Nakkutilliisoqarfianni suli siulittaasuuvunga. Aamma suliakkiissutaasut manna tikillugu suliarisimavagut. Kisianni kissaatigivarput, pissutsit allanngortinneqassasut, aalajangiisarnerit naalakkersuinikkut qalipaasersugaanngitsumik peqqullugit, Kuupik Kleist oqarpoq.

Kuupik Kleist isumaqarpoq, siunnersuutip kingunerissagaa, kommunit tunngavissarissaarnerulluni aqunneqalissasut:

- Uagut kommunillu kissaatigaarput, Kommunit Nakkutilliisoqarfiat inunnik naalakkersuinikkut pituttorsimanngitsunik ilinniakkamikkullu tunuliaqutarissaartunik inuttalersorneqassasoq. Kommunit nakkutigineqarnerat inatsisit naapertorlugit ingerlatsinermut tunngavoq aammalu aningaasanik aqutsinermut tunngalluni. Kommunit uagullu kissaatigaarput, tamakkuninnga tunngaveqarluni ingerlanneqassasoq, apeqqutaatinneqassanngitsoq, kikkut pissaaneq tigummineraat.

Taamaammallu Siumup isornartorsiutaa sumik peqquteqartoq isumaqarpoq erseqqittoq:

- Massakkut qulequtaq sunaagaluarpalluunniit oqallinneq ataasiinnanngorpoq: Naalakkersuisut uppitinneqarnissaat. Naalakkersuisut ajorluinnarnerat, Kuupik Kleist oqarpoq.

Kisianni Naalakkersuisut siulittaasuata taamannak isornartorsiuinera Siumup siulittaasuata illuatungilerpaa. Oqarpoq, oqallinnermut akuliutissanngitsoq:

- Naalakkersuisut siulittaasuata akuleruffissarinngilaa, Inatsisartut qanoq oqalussanersut oqalussannginnersulluunniit. Naalakkersuisut siulittaasuata Inatsisartut sulisitsisorai, Aleqa Hammond oqarpoq.

Taamaattormi oqallinneq sakkortusoq takusinnaavaa, kisianni tassa pissusisamisoortoq oqarluni:

- Inatsisartut uummaarissumik oqalittarnerat nalinginnaasuuvoq. Taanna nutaarsiassaanngilaq. Pissusissamisoorpoq, pingaartitat qallorneqartarnerat. Aamma inuiaqatigiit ajornerusumik atugaqannginnissaannik sulinermi isummat aporaaffiusinnaasarnerat nutaarsiassaangilaq, Aleqa Hammond oqarpoq.