Kuupik mamiatsaqqavoq

Nunatsinni uuliasiornissarsuup qanillinera, danskillu aningaasarsiorluarsinnaanerata eqqartorneqarnera, folketingimi ilaasortap Kuupik Kleist-ip narrutsassimaarutiga.

- Tassa siullermik immaqa oqartoqarsinnaavoq, mamiatsalaarnerusoq taamatut qisuariarnera. Uuliasiornissarsuaq nunatsinni pisussaagaluartoq, Danmarkip aningaasarsiornissarsua kisiat eqqartorneqarpoq. Aamma puigorneqartariaqanngilaq, nunatta danmarkillu akornanni, Naalakkersuinikkut isumaqatigiinniarnermi, aatsitassaqarnermut tunngasut nunatsinnut pingaaruteqartorujussuummata. Aamma namminersorneq pillugu ataatsimiisitaliarsuarmi sulinermi qitiulluinnarlutik. Taamaattumik isumaqarpunga, nunatsinnut naalakkersuinikkut aningaasarsiornikkullu aatsitassarsiornerup pingaaruteqarnera qarsupiinnarlugu taamatut eqqartorneqarmat, arlaatigut aamma allanik oqaaseqartoqartariaqartoq, tassalu nunatsinninngaanniit uuliasiortoqalissagaluarpat, suut uagut soqutiginerigut, suullu anguniartariaqarnerigut, Kuupik Kleist oqarpoq nangillunilu: - Aaqqissuussineq massakkut naapertorlugu, koruunit 500 millionit tungaanut ukiumut isertitaqarsimagutta, Danmarkilu avitseqatigiittussaavugut. Siunissaq eqqarsaatigalugu, aatsitassarsiorneq eqqarsaatigalugu aningaasarsionermi aningaasarsiornerit nunatsinnut tamakkiisumik tuttarnissaat anguniarneqartariaqarpoq. Imaassinnaanngilarmi isertitat affaat qaqugorsuarmut Danmarkimut tunniunneqartassasut, nunarput sinnerlugu folketingimi ilaasortaq, Inuit Ataqatigiinneersoq, Kuupik Kleist oqarpoq.