Kuupik Kleist: Siulittaasutut suleriaaseq allanngussaaq
Inuit Ataqatigiit nutaamik siulittaasortaarput, 49-inik ukiulik Kuupik Kleist ualimut tallimangorluinnartoq, Maniitsumi Inuit Ataqatigiit ataatsimeersuarnerat naggaserlugu qinersinermi ataatsimeersuaqataasunit tamarmiusunit 45-iuusunik taaneqarluni.
-Inuit ataqatigiit suliniutaat anguniagaallu allannguuteqanngillat, naalakkersuisuusarsimavugut anisitaasarsimavugut, namminerlu soraartarluta, sunniuteqarsimavugut annertuumik taamaatumik suliniutigut nangissavagut, Kuupik Kleist oqarpoq.
Siulittaasoq allanngorpoq siulittaasutullu periutsigut assigiinngitsussaapput.
-Aqutseriaatsip tungaatigut assigiinngitsunik periuseqarpugut. Nunatsinni naalakkersuinikkut ingerlatsinitsinni inuit ataasikkaat kissaataat qanorlu piumasaqarnerat, ataatsimut soqutigisaminngarnit ukiuni kingullerni ingerlatsisimanerit allanngortinneqartariaqarpoq, ataatsimoornerullutalu inuiaqatigiit sullittariaqarpagut, Inuit Ataqatigiit siulittaasortaavat Kuupik Kleist oqarpoq.
Suna tamaat akigalugu naalakkersuisooqataalernissaq Inuit Ataqatigiit siunertarinngilaat, naalakkersuinikkut pitsaasumik tatigineqarsinnaasumillu ingerlatsinermik peqataarusupput, Kuupik Kleist oqarpoq.
Naalakkersuisooqataalissagaluarunik partii sorleq suleqatigiumassaneraat apeqqutigigatsigu Kuupik Kleist oqarpoq, siunertat suunersut apeqqutaalluinartuusut, ingerlatseriaaserlu qanoq ittuunersoq apeqqutaassasoq, sangujoraartumillu ingerlannginnissaq, patajaatsumillu ingerlatsisumik suleqateqarnissaq orniginartinneqarnerusoq.
Inuit Ataqatigiit inuusuttai ataatsimeersuarnermi sunniuteqaqataarusullutik sassarput, piumasaqaateqartarlutillu, partiillu suleriaqqinnissaanut
sunniuteqarnerunissaat annertuseriarpoq, maleruagassat allanngortinneqarnerisigut, siulersuisunilu ilaasortaateqalernerisigut. Partiip nutarternera annertusivoq, ingerlatseriaatsimigut ammalu inuttamigut Kuupik Kleist oqarpoq.
Kalaallit nunaata namminersulernissaa Inuit Ataqatigiit suliunitaasa pingaarnersaasa ilagaat.
Kuupik Kleist ilanngullugu oqarpoq, folketingimut tullianik qinersioqalerpat qinigassanngorteqqiniarnani, tungaanulli ilaasortaaginnassalluni.
Kuupik Kleist siulittaasutut qinerneqarnerata saniatigut, siulersuisuni qinerneqarput Asii Chemnitz Narup politikkikkut siulittaasumut tullinngortoq, Bendt B. Kristiansen, Ilulissat, aaqqissuussinermut siulittaasumut tullinngorpoq, Juliane Henningsen Inuit Ataqatigiit inuusuttaaneersoq IA-mi allatsitut qinerneqarpoq,
Ove Karl Berthelsen aningaaserisutut qinerneqarluni.
Taakkuupput Inuiat Ataqatigiit ulluinnarni aqutsisui nutaat.
