Kuupik Kleist: Pingaartitat tunngaviusut salliutinneqassapput
- Inuiaqatigiinni inoqatigiittut ataatsimoorluta naleqartitatta erseqissarnissaat pisariaqartissimavarput. Tassa ataatsimoornermik, inoqatinik ataqqinninnermik, suleqatigiittariaqarnermik aammalu inuunermi pingaartitat allat eqqarsaatigalugit suut toqqammaviginerlugit erseqqissaatigerusussimavarput, neriulluta inuiaqatigiinni ataatsimoorfissatut aallaaviusinnaassasut. Namminersornermut isernitsinni unammilligassarpassuarnik suliaqalernissatsinni toqqammaviusinnaasut neriuutigaarput, Naalakkersuisut siulittaasoriligassaat Kuupik Kleist oqarpoq.
Isumaqatigiissut ullut arfiniliinnaat ingerlaneranni naammassineqartoq sinaakkutissatut isumaqatigiissutaavoq.
- Ukiuni sisamani tulliuttuni anguniagassatut aalajangersukkavut aasap ingerlanerani qanoq piviusunngortissanerlugit pilersaarusiussavagut. Naalakkersuisinngorutta ulloq siullermiit arlalialunnik suliassaqarpugut, tuaviortutut oqaatigineqartariaqartut, taakkualu massakkut piareersaasiorneqarput. Aammali qineqqusaarnermi oqaluuserineqartut, tassalu inuuniarnikkut atukkat, meeqqanut inuusuttunullu aammalu ilinniartitaanermut tunngasut suliassanut siullernut ilaassapput, Kuupik Kleist oqarpoq.