Kuupik Kleist: Oqallinnissamut periarfissiisoqartariaqarpoq

Namminersulernissaq pillugu Nunatsinni innuttaasut novembarip ulluisa 25-anni taasitinneqassasut, Naalakkersuisut siulittaasuata Hans Enoksenip ukiortaami oqaaseqarnermini ilaatigut saqqummiuppaa. Inuit Ataqatigiit siulittaasuata Kuupik Kleistip nutaarsiassatut tamanna tiguaa, taasisitsinissarli sioqqullugu innuttaasut oqallinnissaannut piffissaqarnerunissaat aamma ujartorlugu.
Allattoq Mads Lynge
januaarip 02-at 2008 15:54

- Namminersorneq pillugu Isumalioqatigiissitaliap suliani suli naammassinngilaa, naluarpullu qaqugu naammassineqarumaarnersoq. Aamma folketingimut qinersisoqarnera pissutigalugu isumalioqatigiissitaliami ilaasortaasut ilaasa taarserneqarnissaat imaluunniit taarserneqannginnissaat oqallisaavoq, folketingimullu qinersineq naammassereeraluartoq Hans Enokseni Anders Fogh Rasmussenilu suli aalajanginngillat, Inuit Ataqatigiit siulittaasuat Kuupik Kleist oqarpoq, nangipporlu:

- Inuiaqatigiinni sukumiisumik oqallinnissap periarfissaqartitaanissaa, innuttaasut qanoq sivisutigisumik periarfissinneqassanersut pineqartumut pingaarutilerujussuarmut isummersornissaminnut, naggataatigullu taasiartornisssaminnut aamma periarfissaasariaqarpoq. Taamaattumik piffissaq matumani apeqqutaasupilorujussuuvoq, Kuupik Kleist oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq