Kuupik Kleist: Nunasiniarnermut akuersissuteqarsinnaaneq oqartussaaffigisariaqalerparput
Nunatsinni nunasisunut tunngatillugu Danskit piumasaqaataat nunatsinnissaaq atuuttoq peqqutigalugu arnaq Franskeq nunatsinniit anisitaasussanngortoq sapaatip akunnerani kingullermi tusagassiuutitigut saqqummiunneqarpoq.
Apeqqut tamanna pillugu, Kuupik Kleist isumaqarpoq, nunatsinni naalakkersuisut danskit naalakkersuisuinut piaartumik isumaqatiginniuteqartariaqartut:
- Apeqqummut uunga tunngasumik tassa Danmarkip naalagaaffiani innuttaassuseqalersinnaanermut tunngasoq soorunalumi naalakkersuisut Danmarkimi aamma danskit inatsisartuisa tamanna isummerffigisassarivaat. Kisianni uanga isumaqarpunga nunatsinni najugaqarniarluni aammalu suliniarluni nunaserusunnermut tunngasoq nunatsinninngaanniit nammineerluta taanna oqartussaaffigilersinnaagaluaripput, Kuupik Kleist nassuiaavoq nangillunilu:
- Aamma namminersorneq pillugu isumalioqatigiissitap isumaliutissiissummini tamanna sammivaa, tassa apeqqut tamanna itisuumik oqaluuserinikuuarput, nunatsinni sulisussanik pisariaqartitsinerput aammalu siunissami pisariaqartitsilernissarput eqqarsaatigalugu.
Aamma minnerunngitsumik Danmarkimi pingaartumik Dansk Folkepartip allamiunut pissusilersuutaat eqqarsaatigalugit piumasaqaatit uagut isumaqatigisinnaannginnatsigit, taamaammat kissaatigisimavarput oqartussaaffiup tamatuma nunatsinnut nuunneqarsinnaanissaa. Tamannalu periarfissanngussaaq namminersorneq pillugu inatsit atuutilissappat aappaguminngaanniit, Kuupik Kleist oqarpoq.
Nunatsinni nunasisinnaanerup oqartussaaffigilernissaanut naalakkersuisut politikkikkut oqartussaaffiup tigunissaanut qaqugu pisinnaanissaa pillugu Kuupik Kleist aperineqarami oqarpoq, savalimmiormiutut iliortoqarsinnaasoq:
- Uanga isumaqarpunga savalimmiormiutut iliortoqarsinnaaasoq, tassa oqartussaaffiup nunatsinnut nuunneqarnissaata tungaanut immikkut akuersissuteqarluni nunatsinni najugaqarlutillu suliniartut qanoq ittunik piumasaqaateqarfigineqassanersut maanngaanniit aalajangersorneqarsinnaaneri periarfissatut isigigaluarpara, tassa oqartussaaffiup tigunissaata tungaanut aaqqiisoqarsinnaagaluarpoq, soorlumi Savalimmiormiut taamaaliorsimasut, Kuupik Kleist nassuiaavoq nangillunilu:
- Taamaattumik nunatsinni naalakkersuisut Danmarkimi naalakkersuisunut aqaguluunniit saaffiginnissuteqarsinnaapput, akuersaarneqassappallu Danmarkimi innuttaassuseqalinngikkaluarluni nunatsinni najugaqarsinnaaneq sulisinnaanerlu maanngaanniit oqartussaaffigineqalersinnaangaluarmat, Kuupik Kleist oqarpoq nangillunilu:
- Isumaqarpunga suliassat taamaattut piffissami aggersumi amerligaluttuinnassasut, taamaattumik oqartussaaffigilernissaanut maannangaarlu suliniutigilereernissaanut pissutissaqarluarpugut, uagullu naalakkersuisugut kajumissaaginnassavakka suliassaq piaartumik aallarteqqullugu piaartumillu Danmarkimi naalakkersuisunut saaffiginneqqullugit, Kuupik Kleist kaammattuuteqarnermini taama naggasiivoq.
