Kuupik Kleist: Naaggaarussi unissaagut!
Qanoq isumaqarlutit taama oqarpit?
- Namminersornerullutik Oqartussaanerup ukiut 30-inngortuni atuussimasup killissani tikissimavaa. Naalakkersuinikkut eqqarsarneq aammalu inatsisitigut periarfissarititaasut eqqarsaatigalugit, killissat tamarmik tikinneqareersimanngikkunik qaangerneqareersimasutut oqaatigisariaqarput.
Nunatta naalakkersuinikkut ineriartornera nangissappat taava alloriarnerup tullissaa soorunami tassaasariaqarpoq namminersorneq, taamaattumik oqarpunga naameerutta aaqqissuussinerput massakkut atugarput, ukiunilu 30-ni kingullerni atorsimasarput, uniffigiinnassavarput, taava naalakkersuinikkut inuiaqatigiittullu ineriartornerput tassunga ikkarlittussaassaaq, Kuupik Kleist oqarpoq.
Nunami inuit tamat oqaasissaqaqataaffianni innuttaasut amerlanerit naaggaassangaluarpata tamanna kukkunerussasoriviuk?
- Soorunalimi kikkut tamarmik oqartussaanerat naapertorlugu ingerlatsivugut, taamaattumik aamma oqarsinnaavugut qanoq isumaqarnerluta, tassalu naameerneq - uagut isumarput naapertorlugu - kinguneqassooq inuiaqatigiittut naalakkersuinikkullu ineriartornerup ikkarlinneranik, aammalu qaqugu nikeriaqqinnissamut periarfissaqassanersoq nalunarsissalluni, Kuupik Kleist oqarpoq.
Demokratineersoq Palle Christiansen oqarpoq Kuupik Kleistip tunngavilersuutissaarukkami ersisaarineq annilaangasaarinerlu sakkuginiarsarilerai.
- Naaggaartoqaraluarpat ineriartorneq uninnavianngilaq, taamaallaat unittussaapput politikerit qinersereerutta taarserneqartussat, Palle Christiansen oqarpoq.
