Kuupik Kleist: Misileraasimaneq qulaajartariaqarpoq
- Isumaqarpunga pisimasoq alianartuusoq, nunasiaateqartartullu piffissap ingerlanerani qanoq iliuuseqartarsimanerannut takussutissaalluni. Pisimasup pillugu arlaatigut naammassineqarnissaa qaangerneqarnissaalu pillugu iliuuseqarfigineqartariaqarpoq, Naalakkersuisut siulittaasuat Kuupik Kleist oqarpoq.
Kalaaliaqqat 22-t taamanikkut 1951-imi Danmarkiliaanneqarput, aallarunneqartullu aamma ilaqutaasut utoqqatsertoqarnissaanik ilaatigut piumasaqaateqarput, naallu tamanna Kuupik Kleistip tapersersornartikkaluaraa, utoqqatsertoqassanersoq erseqqissumik oqaatigisinnaannginnerarpaa, qulaajagassammi suli amerlapput, utoqqatsernerlu immaqa naammanngilaq:
- Naalakkersuisut siulittaasuattut apeqqutaaneruvoq aqqutit suut atorlugit qaangiiniarnissaq pitsaanerpaaq nassaariniarneqassanersoq. Oqaaseq utoqqatserneq ilumut taannaannaassanersoq apeqqutaavoq, utoqqatsernerlu pissusissamisoornersoq aamma apeqqutaalluni. Tamakkua suli tikinnikuunnginnatsigit erseqqinnerusumik oqaatigisinnaanngilara, Kuupik Kleist oqarpoq. Taanna ulluni makkunani Schweizimi Genéve-imiippoq, Naalagaaffiit Peqatigiit inuit pisinnaatitaaffii pillugit kommissioniata ataatsimiinnerani oqalugiariartorluni.