Kuupik Kleist: Meeqqat uersakkat pillugit misissuisoqartariaqarpoq

Meeqqat uersakkat 100-likkaat kina ataatarinerlugu naluaat, inatsisit maanna atuuttut pissutaallutik tamanna pillugu pisinnaatitaaffeqaratik, inatsimmillu allannguinissaq pillugu iliuuseqartoqartariaqalersoq, Naalakkersuisut siulittaasuat Kuupik Kleist oqarpoq.
Allattoq Mads Lynge
decembarip 06-at 2009 17:40

Kuupik Kleist uersakkatut 1958-imi inunngorpoq, ilaqutariinnermullu tunngassuteqartunut inatsisit allanngortinneqarnissaat taassuma ujartorpaa:

- Ilaqutariinnut tunngasunik inatsisiliorneq Namminersulernerup eqqunneqarneratigut Nunatsinninngaanniit akisussaaffigineqalersinnaasut ilagivaat, misissuinitsinnilu aammalu pilersaarutini pioreeersuni ilaqutariinnut tungasunut inatsisit allanngortinneqarnissaat danskit naalakkersuisui isumaqatigalugit ukiut marluk pingasulluunniit ingerlaneranni allanngortinneqartussatut pilersaarutaasimavoq, kisianni isumaqarpunga malunnartoq sukkanerusumik allanngortittariaqartut, Kuupik Kleist oqarpoq.

Pitsanngorsaanissamut periarfissat suunersut aamma qulaajarneqartariaqartut taassuma oqaatigaa.

- Ukiut 40-t 50-illuunniit akornanni pisimasut iliuuseqarfigiuminaapput, siunissamut sammisumik aaqqiissuteqarsinnaaneq sammisariaqarparput, Naalakkersuisut siulittaasuat Kuupik Kleist oqarpoq. Ilaqutariinnermut tunngassuteqartunut inatsisit allanngortinneqarnissaat pillugu inatsiseqarnermut ministereqarfik maanna suliaqarpoq.

Meeqqat uersakkat pillugit inatsisit, aappariit avinnerannut tunngasunut inatsisit angajoqqaatullu akisussaaneq pillugu inatsisit ilaatigut allanngortinneqassallutik.

Meeqqat uersakkat pillugit oqaluttuat allat nittartakkatsinni atuarsinnaavatit, immikkut sammisatsinni "Ataataga kinaava?".

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq