Aningaasaqarnermut Ataatsimiititaliamittaaq aamma uparuarneqarpoq, Air Iceland Namminersorlutillu Oqartussat akunnerminni isumaqatigiissusiornialeramik aningaasat qassit sipaarutigineqassanersut iluamik misissorluarneqarsimanngimmat.
Taamaattumillu aalajangiinissamut tunngavissap sulisuliarilluagaanerusup suliarineqarnissaata tungaanut akikillisaaffigineqarnissamik isumaqatigiissutit atorunnaarsinneqassasoq ataatsimiititaliamit Naalakkersuisunut kaammattuutigineqarluni.
Tamanna pillugu Kuupik Kleist akissuteqarpoq, Aningaasaqarnermut ataatsimiititatiamit allakkat tigusimallugit. Taamaasillunilu kingusinnerpaamik ataasinngorpat akissuteqassalluni. Allakkiani oqaaseqarfigisinnaanngilaa qanoq oqariartuuteqassanersoq, kisiannili oqaatigaa Aningaasaqarnermut Ataatimiititaliami ilaasortat allagaat ilumoorullugu tigullugu, taamatullu aamma oqariartuutigineqartut ilai akuersaarlugit.
Aperineqaramili Air Iceland Namminersorlutillu oqartussat isumaqatigiissutaat atorunnaarsinneqassanersoq, oqaaseqarfigisinnaannagu oqaatigaa.