Kuupik Kleist: Ajornartorsiutaasarsimasut qaqilertariaqarput
Kuupik Kleistip pisut arlallit, Kalaallit Nunaanni alianartutut suli eqqaamaneqarlutillu isigineqartut, misissuivigeqquai. Soorlu amerikamiut Pituffik sanammassuk Inughuit pinngitsaalisaallutik nuutsitaanerat, taavalu timmisartup qaartartunik nakkaatitsisartup, B-52-ip, 1968-imi nakkarneranut tunngasut misissorneqartariaqarput, Danmarkiluunniit isumaqaraluarpat tamakku qangali naammassereersut, Kuupik Kleist Danmarkip Radioanit apersorneqarluni ullaaq oqarpoq:
- Imaassinnaavoq ministeriaqarfinni departementeqarfiillu isumaqartut tamakku oqallisigeqqinnissaat pisariaqanngitsoq. Inuilli taamani eqqugaasut isumaqarpata pisut suli naammassinngitsut, taava misissuineq suli ingerlaqqittariaqarpoq.
Per Ørum Jørgensenip, Konservativit Kalaallit Nunaannut tunngassuteqartunut ataatsimiititaliaanni ilaasortap, iluarsaassisoqarnissaanik kissaateqarneq paasilluarsinnaavaa. Pisunut tunngasunik paasissutissanik nutaanik saqqummersoqassappat suut tamarmik qaqilerneqarnissaat ajornartorsiutaanaviannginnerarpaa.
- Kalaallit Nunaata Danmarkillu akornanni atassuteqarnerup pitsaasuunissaat pisariaqarpoq, Arlaannik artornartoqarpat tamakku nerrivimmut qaqinneqartariaqarput, uanga tamanna ajoriffissaqartinngilara, Per Ørum Jørgensen Danmarkip Radioani ullaaq oqarpoq.
Kalaallit Nunaannut tunngassuteqartunut ataatsimititaliaq septembarimi ataatsimiissaaq, meeqqat immikkut toqqagaallutik misiliutitut 1951-imi Danmarkiliartitaasimanerat qanimut misissorneqassanersoq oqaluuserissallugu.
