Kuupik allatut iliorsimassagaluarpoq

Namminersorlutik Oqartussat pisortaqarfiini sulisut soraarsitaasarneri aamma suliunnaartarneri pillugit, Naalakkesuisut siulittaasuat, Aleqa Hammond radioaviisimut tallimanngormat kiisami nassuiaateqarpoq ullaatungaani naatsumik tusagassiutinut nalunaaruteqarnermi kingorna.

Inatisartuni illuatungiliuttunilli partiit annersaannit, Inuit Ataqatigiit siulittaasuannit, Kuupik V. Kleistimit nassuiaatit naammagineqanngillat.

- Politikerit akornanni kisimi pinnani kisianni inuiaqatigiiusugut akornatsinni toqqissisimanngitsumik inissittoqarnerata kinguneranik, arlaatigut anillariarfissamik aamma nassuiaammik paasineqarsinnaasumik oqaaseqartoqarnissaa kissaatigaarput,  Kuupik V. Kleist oqarpoq.

Inuit ataasiakkaat pillugit oqallinneq Aleqa Hammondip peqataaffigerusunngimmagu, Kuupik V. Kleistip isumaqatigisinnaagaluarpaa. Inuit Ataqatigiilli siulittaasuata oqaatigaa pisoq inunnut ataasiakkaanut tunngassuteqarunnaarluni politikkimut tunnganerulersimasoq.

- Soorunalimi Aleqa Hammond isumaqatigisinnaavara, inunnut ataasiakkaanut tunngasut saqqumisumik eqqartorneqarsinnaannginneri, kisianni pineqartoq tassaajunnaarnikuuvoq inunnut ataasiakkaanut tunngasut, taamaattumik Naalakkersuisoqarfinni pisortat amerlanersaasa qaffasissumillu inissisimasut atorfillit pineqarnerisa kingorna Naalakkersuisunit politikkikkut isummerfigineqartariaqaraluartut, Kuupik V. Kleist oqarpoq.

Pisut inunnut ataasiakkaanut tunngassuteqarneri nassuiaatissaqassagaluartut aammalu isertuunneqartariaqanngikkaluartut, Kuupik V. Kleist isumaqarpoq, oqaatigalugulu nammineq siuttuusimasuuguni allatut iliorsimassagaluarluni.

- Aleqa Hammonditut iliorsimanavianngikkaluarpugut. Uangut Naalakkersuisuunitta nalaani taama pisoqarsimassagaluarpat taava tamanna patsisissaqarsimassagaluarpoq inunnut ataasiakkaannut tunngaannarani kisianni ingerlatsinermut tunngalluni.

Kuupik V. Kleistip erseqqissaatigaa isornartorsiuiniaannarluni oqaaseqannginnami imalu nangilluni oqarluni.

- Isumaqarpunga toqqissisimananngitsut taama annertutigisumik taarseraattoqarnera.

Inatisartuni illuatungiliuttut Inuit Ataqatigiit siulittaasuat, Kuupik V. Kleist oqarpoq.