Kuup ernga appariarsimaqaaq

Imeq ippassigami qaffaruttormat, ruujorit erngup aqqutai erngup qaavanit meterip ataatsip missaanik appasinnerusumiileraluarput. Ruujorit erngup aqqutai maanna imermit meterip missaannik qaffasinnerusumiilerput, Fritz Baumann oqarpoq.

Tamatuma peqatigisaanik nunaqarfiup kujataatungaata innaallagiaqanngitsup, innaallagissamik pilersoqqinneqalernissaa Tele-mit sulissutigineqaleruttorpoq.

Borgmester Hermann Berthelsenip aamma Naalakkersuisunut ilaasortap Jens B. Frederiksenip ippassaq ataatsimeeqatigiinnerat, angusaqarfiulluartutut Fritz Baumannip oqaatigaa.

Ataatsimeeqatigiinnermi illuatungeriit isumaqatigiissutigaat, Namminersorlutik Oqartussat aamma Mittarfeqarfiit imermik innaallagissamillu pilersuinerup piffissami qaninnermi isumannaatsuunissaannut pisariaqartunik iliuuseqassasut, taamatullu piffissamut ungasinnerusumut pilersuinermut aqqusersuutinik isumannaatsunik pilersitsinissamut pilersaarusiortoqassasoq.

Qeqqata Kommunia kujammuinnaq ikaartarfimmik aaqqiissuteqarallarnissamik piaartumik pilersitsinissamut tunngatillugu pisariaqartunik iliuuseqassasoq aamma isumaqatigissutigineqarpoq.

Ikaartarfiugallartussap qanoq pilersinneqarsinnaanera Fritz Baumannip aqagu annerusumik paasisaqarfigissallugu naatsorsuutigaa. Sanaartornermik ingerlatallit Nunatsinneersut arlallit aaqqiissutissamik neqerooruteqareerput.

Imeq nalinginnaanerusumut apparpat Qeqqata Kommunia misissueqqaarnernik aamma iluarsaassinissamut pilersaarusiornermik aamma kuummi ikaartarfiup qajannaallisarnissaanut suliaqarluni aallartissaaq, taamaalilluni siunissamut isumannaallisarneqassalluni aamma silap pissusaata allanngoriartornera sillimaffigineqassalluni.

Tamanna Qeqqata Kommuniata akisussaaffigissavaa, attaveqaqatigiinnermulli naalakkersuisoq Jens B. Frederiksen Radioaviismut ippassaq erseqqissaavoq, ikaartarfiup nutaap pilersinnissaata qanoq akeqarnissaa paasineqariarpat, Namminersorlutik Oqartussat aningaasaleeqataajumaartut.

Siunissami tassunga assingusumik pisoqariataarnissaanut upalungaarsimanermut pilersaarutinik Qeqqata Kommunia Namminersorlutik Oqartussanit ikiorneqarluni pilersitsissaaq.

Namminersorlutik Oqartussat aamma Qeqqata Kommunia suliassat ingerlateqqinnissaat pillugit suleqatigiissapput.