Kuunni 33-ni kapisilinniarneq ulluligaanngitsumik unitsikkallarneqarpoq
Imaq pineqartoq Sverigep killeqarfiata kujasinnerusortaaniippoq, Trøndelag-llu eqqaani nunap qiterpasissuaniilluni.
Kapisilinniarnissamullu inerteqquteqalerneq sapaatiummat unnuakkut atuutilersinneqarpoq.
- Kapisillit amerlassusaannut kapisilinniarneq innarleerujussuarsinnaavoq, taamaammat isumaqarpugut iliuuseqartariaqarluta, Ellen Hambro, avatangiisinut aqutsisoqarfimmi pisortaq nutaarsiassaqartitsivimmut NRK-mut taama oqarpoq.
Inerteqquteqalernerlu qaqugu unissanersoq suli ullulerneqanngilaq.
Kapisillillu amerlassusaannut silap pissusiata allanngoriartornera, kapisilinnullu tukertitsiviit kapisillit amerlassusaannut innarliisuunerpaasut noorskit oqartussaasui naliliipput.
- Kapisilinniarsinnaanerup unitsittariaqarnera ajuusaarutigeqaarput. Aasamimi kapisilinniarneq amerlasuunut ileqquuvoq nuannaarutaasaqalunilu, kapisililli ataasinnguarluunniit maanna apeqqutaalerpoq, avatangiisinut aqutsisoqarfimmi pisortaq Ellen Hambro taama oqarpoq.
Sumiiffinnili ukunani Nordland, Troms, Finnmarkimilu Norgep avannarpasissuaniittunut suli kapisilinniartoqarsinnaavoq.
Kapisillillu ukiup tullianimut aatsaat suffilluarsimappata pisarineqaqqissinnaalerumaartut tamatumanilu oqartussat suliassarigaat Ellen Hambro-p ilanngullugu oqaatigaa.
Sapaatip akunnerisa siuliani inerteqquteqalernissamut aarlerisaarisoqareersoq piviusunngortinneqarpoq.
Inerteqquteqalerneq Sverigep killeqarfiata kujasinnerusortaaniippoq, Trøndelag-llu eqqaani nunap qiterpasissuaniilluni.
Sumiiffinnilu assigiinngitsuni aamma inerteqquteqalerneq atuutilersinneqarpoq.
Aalisarnermut inatsimmi inatsit atuutilersinneratigut kapisileqassuseq annaanniarneqarpoq.
Silallu pissusaata allanngoriartornera nunarsuarmi uumasunut kingunipiloqarpoq, uumasullu amerligaluttuinnartut nungutaanissaminnut ulorianartorsioraluttuinnarput. Tamanna uumasunut ulorianartorsiortunut allattorsimaffik avatangiisinut illersuiniaqatigiit IUCN-mik misissorneqarsimavoq.
Allattorsimaffillu ukioq kingulleq decemberimi FN-p silap pissusaata allanngoriartorneranut ataatsimeersuarnermi Dubai COP28-mi saqqummiunneqarpoq.
Siullerpaamillu nunarsuarmi aalisakkat kuummiittut amerlassusaat nalilersorneqarput, taakkualu aalisagaqassutsip 40 procentiisa missaraat.
Misissorneqartullu aalisakkat kuunniittut 15.000-usut sisamararterutaat nungunneqarnissaminnut ulorianartorsiortitsipput.
Kisitsisit takutippaat nunarsuarmi kapisileqassuseq 2006-p 2020-villu akornanni 23 procentimik appariarsimasoq, kapisileqassuserlu aarlerinartorsiornissamut qanillisoq aamma paasissutissiissutigineqarpoq.
