Kuummiuni ineqarnikkut nutarterisoqarnissaanik nunaqarfiup aqutsisuini siulittaasoq Anders Sanimuinnaq ujartuivoq.
Taanna ilisimatitsivoq Kuummiuni 1950-ikkunni 1960-ikkunnilu sanaartornerujussuup kingornatigut ineqarnikkut nutaaliortoqarsimanngitsoq. Illullu amerlasuut taamanikkornisat aserfallatsaalineqarsimanngillat maannalu aserfallassimaqalutik.
- Innuttaasut ilaat illumi 30 kvadratmeteriusumi ilaatigut quliullutik inooqatigiittut nalinginnaapput, taakkulu isertitakitsuullutik. Ilaqutariit taamaattut inooqatigiinnermikkut ajornartorsiortorujussuupput, Anders Sanimuinnaq sermersooq.gl-imut oqarpoq.
Anders Sanimuinnarlu aamma isumaqarpoq tattuunnerup kinguneranik eqqiluisaarniarneq tattuunnerup kingunerisaannik ajornartorsiutaasoq. Eqqiluisaarniarnermillu ajornartorsiut pissutaasinnaasoq Kuummiuni innuttaasut 343-sut, 43 %-ii TB-mik tunillatsissimanerannut.
Nunaqarfiup aqutsisuisa siulittaasuata allakkamini taakkartugai, peqqissaasup tassa illut piitsuunerlu pillugit TB-p tunillaasuunneranik allaaserisaqarnera ilisarisinnaalluarpaa.
Taamaammat Nunaqarfiup aqutsisuisa siulittaasuat nunaqarfiup illuinik nutartereqqusivoq, kiisalu illup iluani eqqiluisaartarnissaq pillugu paasissutissiisoqarnissaanik kissaateqarluni.
Anders Sanimuinnaq nangilluni allappoq:
- Illut taamaallaat arfinillit arfineq marlulluunniit ukioq 2000-ip missaani sananeqarput, eqqaamasaqanngilangalu tamatuma siornatigut kingornatigulluunniit allanik illuliortoqarneranik.