Kuummiuni aalisakkanik tunitsivik ammarpoq
Kuummiuni aalisartut aalisakkanik tunitsivimmut ullumikkuminngaaniit tunisisinaalerput.
Aalisakkanik tunitsivik Arctic Prime Produktióne-mit pigineqartoq ullumikkut ammarneqarpoq.
Tamanna Kuummiuni aalisartunut nuannaarutaavoq, taamak oqarpoq tunitsivimmi ingerlatsisoq Karl Boassen, naatsersuutigineqarporlu ataasinngorpamiit qaleralinniat tunitsivimmut tunioraallutik aallartissasut.
Saarulleqarluarmat tunitsiviup ammaqqinneqarnerani Kuummiuni suliffissaqartitsisinnaalerrissaa neriuutigineqarpoq
Aalisakkanik tunitsiviup Arctic Prime Produktion-ip pisortaa Kim Høegh Dam oqarpoq, aalisakkanik tunitsivik akilersinnaasumik ingerlassappat, ukioq naallugu avataaniit tulaasuisoqarnissamut pisassiisoqarnissaa pinngitsoorneqarsinnaanngitsoq.
Pissassiisoqarnissamullu qinnuteqarnissamut piumsaqaatiginiarneqartoq, pisassat immikkut Kuummiunut iluaqutissatut tulaassassat qinnutigineqassasut.
Namminersornerullutik Oqartussat Aalisarnermut Piniarnermullu pisortaqarfimmi allaffimmi pisortaq
Emanuel Rosing oqarpoq maannangaaq neriorsuutigisinnaanagu Kuummiormiut pissassinneqarsinnaanersut. Ukiaru novemberip qaammataani decemberimiluunniit aappaagumut 2008-imi pisassanik naalakkersusiut agguaassissapput, aalisarnermillu ingerlatsereersut siulliullugit pisassinneqartarput, pisassiissutigineqartullu sinneqarpata, sinneruttut qinnuteqartunut nutaanut tunniuneqartartut, Emanuel Rosing oqarpoq.
Kuummiuni tunitsivik siornatigut avataaniit aalisakkanik pilersorneqarsimmanngimat Kuunmiunut pisassiisoqarsinnaanersoq oqaatigisinnaannginerarpaa.