Kuummiormiut: Tunisinissamut ajornartorsiutit pissutaapput

Nutartigaq 28.10.

Una erseqqissaatigeqqaassavarput: Kuummiormiut Nunatsinni isertitakinnerpaasut pillugu radioaviisimi ilanngutassiinermi paatsuungatitsisimavugut.

Ilanngutassiami Kuummiuni nunaqarfiup siulersuisuini siulittaasup Anders Sanimiunnaap oqaatigaa, Kuummiormiut isertitakinnerannut pissutaaqaasoq tassaasoq, aalisakkanik tunitsivimmut Arctic Green Food-imut tunisiniaraanni 1.500 koruuninik akileeqqaartarnissartik pissutigalugu aalisartut amerlanerit tusisinnaanngitsut.

Aalisakkanik tunisisinnaanermut akiliut 1.500 koruuniusoq Arctic Green Food-ip piumasaqaatiginngimmagu erseqqissaatigissavarput, tunisisinnaanermut akiliut Namminersorlutik Oqartussat piumasaqaatitut inatsisinngortitarimmassuk. Kukkunerput ajuusaarutigaarput.

Nutaarsiassaq imaalerpoq:

Kuummiuni isertitat amerlanerusinnaagaluarput, nunaqarfimmi tunitsivimmut akileeqqaarluni tunisisinnaaneq piumasaqaataanngikkaluarpat, Kuummiuni nunaqarfinni aqutsisut siulittaasuat Anders Sanimuinnaq oqarpoq.

Puisit amiisa tunineqartarnerat ammarneqaraluarpoq, ingerlaannarli matuneqaqqilluni.

- Aalisartut aalisakkanik tunitsivimmut Arctic Green Food-ip tunitsivianut tunisiniarunik Namminersorlutik Oqartussanut 1.500 koruuninik akileeqqaarlutik aatsaat tuninisinnaapput, tamannalu Kuummiuni aalisartut aporfigisaraat Anders Sanimuinnaq-p oqaatigaa.

Tunisisinnaanermut akiliut Namminersorlutik Oqartussat piumasaqaatitut inatsisinngortitaraat. Tamanna naalakkersuinikkut aalajangigaavoq inatsiliuunneqarneralu allaaserineqarpoq, Namminersorlutik Oqartussat naluaarutaanni nr. 2-mi 12. februar 2010 -imeersumi, aalisartut ukiumut akileeqqaarlutik tunisisinnaanerannut tunngassuteqartoq.

- Aalisartut aalajangersimasunik tunitsivimmut tunisisartut marluupput, amerlanerusinnaagaluarput akileqqaarnissamut piumaqaat atuutinngikkaluarpat, Anders Sanimuinnaq oqarpoq.

Qalerallit annertunerusumik tunitsivimmut tunineqartarput.

Puisit amiisa tunineqartarnerat oktobarip qaammataanni ammarneqaraluarput, ingerlaannarli unitsinneqarput, taamaalillutik Kuummiuni piniartut puisit amiinik tunisisinnaanerat untsinneqarluni.

Kuummiuni innuttaasut 1. januar 2010-mi 358-inik amerlassuseqarput, nunatta naatsorsueqqissaartarfiata kisitsisaatai malillugit.

Kuummiuni Nunaqarfinni aqutsisut siulittaasuat, Anders Sanimuinnaq aamma isumaqarpoq, takornariaqarneq pillugu paasissutissanik Kuummiuni innuttaasut qaammarsarneqarpata, takornarianik sullissineq nunaqarfimmi isertitsissutissatut periarfissaagaluartoq.

- Kuummiuni inuussutissarsiutinik periarfissaqannginnera pissutaalluni Kuummiuni innuttaasut nunaqarfitsik qimallugu aamma aallartarput, nunaqarfimmi aqutsisut siulittaasuat oqarpoq.