Kuultisiortunut radio knr-tv-lu ajornarunnaarput
- Nutaarsiassanik radiukkullu aallakaatitanik allanik tusarnaarsinnaaleratta iluaallaqaaq. Aamma KNR TV canadamiullu TV-kkut aallakaatitsivii arlaqartut isiginnaarsinnaalerpavut, taama oqarpoq Nanortalimmeersoq Andreas Egede, Crew Development Corporation piginneqataasorlu Nuna Minerals, 2000-imi Nalunami kuulteqarneranik misissueqqaalermatali sulisuusoq.
Radiukkut tusarnaarsinnaalerneq tv-kkullu isiginnaarsinnaalerneq qaammatit marlussuit matuma siorna aatsaat iluatsippoq.
- Aningaasanik millionit affaanik tamanna piginnittunut aningaasartuutaasimavoq, taamaalilluta Parapol-i iluaqutigalugu Greensat-ip nassiussugai tigoorarsinnaanngorlutigik, taama nassuiaavoq Nalunami ujarassiuut pisortaat, Kurt Christensen.