Kuultisiorfimmi ajutoornermi inuit sisamat maqaasineqalerput

Tamatumuuna ajutoorneq Ecuadorimi kuultisiorfimmi pivoq. Kuultisiorfimmi piiaaffiup ilaa nakkaattoormat, piiaaffimmi sulisut sisamat anisinnaajunnaarsimassangatinneqarput. Annaassiniartartut ajutoorfik nunap qaanit 150 meterinik atsinnerusumiittoq maanna tikinniarsaralugu qilleripput.

Aatsitassarsiorfimmi Casa Negra-mi Ecuadorip kujammut kippassissortaaniittumi Portovelo-miittumi sulisut arfininngornermi ualigaa nalunaarput maqaasineqartut uumanersut suli nalunartoq, maannamummi nipinik - uumanerannut uppernarsaataasinnaasunik suli tusaasaqannginnamik. Piiaaffimmi sulisut pingasut Ecuadorimiuupput ataaserlu Ecuadorip sanilianit Perumeersuulluni.

Amerikami Kujallermi Chilemi aatsitassarsiorfimmi San Jose-mi piiaaffimmi sulisut 33-t ulluni 69-ini matoorussaaqqareerlutik annaanneqarnerat tallimanngormat nuannassutaaleruttortoq Ecuadorimi kuultisiorfimmi ajutoorneq pivoq.