Kuulti ersiinnartoq nassaarivaat

Aatsitassarsioqatigiiffik NunaMinerals Nuup Kangerluani kuultisiorpoq, Qussummi kuultisiortoqarami. Sumiiffinni assigiinngitsuni qulini qillerinerit siulliit takutippaat kuultit ersiinnartut NunaMineralsimit nassaarineqartut. AG-mi tamanna atuarneqarsinnaavoq.
Allattoq Mads Lynge
juulip 24-at 2008 06:16

- Kuultit ersiinnartut 2007-imi nunap qaaginnaani NunaMineralsimit nassaarineqartut qaarsup iluani aamma nassaassaasut qillerinerit tamarmik takutippaat, AG allaaserinnippoq.

Kuulteqarfik NunaMineralsip nassaassamisut neriuutigisimasaa ilumut nassaassaasoq ilimanarpoq, naak takussutissaannaat pineqaraluartut.

Siunissami tamaani imminut akilersinnaasumik kuultisiorfeqalernissaa ilimanaateqarluinnarpoq.

- Sapaatip-akunnerini aggersuni qillerinernit misissugassat tiguneqarsimasut misissussavagut. Nunap qaaginnaani nassaarineqartut assigalugit misissugassat ilimanaateqarluarput, NunaMineralsip pisortaa Ole Christiansen oqarpoq.

Qillerinerit siulliit kinguneqartikumallugit aatsitassarsioqatigiiffik aggustimi septembarimilu qaarsumi suli 1000 meterisut isorartutigisumi qillerissaaq.

Nuup Kangerluani Isukasiani NunaMinerals maannakkut aamma qillerisitsivoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq