Kuuit qarsutsipput - kiassuarpoq - orpippassuit ikuallapput anorersuarujussuarlunilu

Tuluit Nunaanni Irlandimilu kuuit qarsutsipput, Italiami Grækenlandimilu kiassuarpoq, Californiami orpippassuit ikuallapput Pakistanimilu anorersuarujussuarpoq.

Nunarsuatsinni sumiiffinni assigiinngitsuni sila maanna tassa taama pivoq.

Tusagassiorfiit sila sammingaatsiarpaat, allaat ingasangajattumik, aviisimut Politikenimut taama oqarpoq DMI-mi silasiortoq, Kim Sarup.

Allaanngilaq tusagassiorfiit innermut supoorisut.

-Silarsuarmi silap assigiinngitsumik pisarnera nalinginnaavoq. Nalinginnaanngilarli tusagassiorfiit taama samminnitsiginerat, Kim Sarup oqarpoq.

Tusagassiorfiit taamarujussuaq samminninnerisa saniatigut, Kim Sarup isumaqarpoq, maluginiarneqartariaqartoq Europap kujataani kangisissuani sapaatip akunnerini makkunani kiassuarmat, tassa 40-t sinnerlugit kialluni.

Grækenlandimi 46-nik kiappoq, ernummatigineqarporlu kiarujussuarnera pissutigalugu inunnik toqorartoqalissasoq, orpippassuillu ikuallalernissaat aamma annilaanngatigineqarpoq. Europami 2003-mi kiarujussuarmat inuit 20.000-init amerlanerit toqupput.

Grækenlandimi oqartussat upalungaarsimalluarput.

Grækenlandimili silasiorfiup ilimagaa, sisamanngorpamiit kiappallaarunnaassasoq, navianartorsiornerlu qaangerneqarumaartoq neriuutigineqarpoq.