Kussinermut nakkartoq imigassartorsimasutut pasineqarpoq
Ilulissani marlunngormat unnukkut qulinngiluat eqqarigaa arnaq biilerluni utoqqaat illuata eqqaani ajutoorpoq.
- Aqqusernup aqqata allattorsimaffiat aporpaa biilillu kussinermut nakkarput. Politiinit tigusarineqarpoq, taama politiit ittuat Johan Davidsen oqarpoq.
Politiit ajutoorfiusumut apuukkamik arnaq imigassartorsimassasoq pasitsaappaat. Ilumut imigassartorsimanersoq qanorlu promilleqarnersoq paasineqarniassammat aaversissasoq aaliangiunneqarpoq . Aaversinnerup inerneri aaliangiisuussapput arnaq pineqaatissinneqassanersoq.
-Inunnik ajoqqusertoqanngilaq. Ingerlatitsisinnaanermut allagartaq arsaarinnissutigineqarsinnaavoq imaluunniit akiligassinneqarsinnaavoq, taama politiit ittuat Johan Davidsen oqarpoq.
Arnaq biilerluni ajutoormat takunnittuusoq oqaluttuarpoq arnap biilerluni kussinermut nakkareernermi kingorna artulersimasoq. Politiit tamanna pisimanissaa uppernarsarsinnaanngilaat.
