Kusanartoq ulorianartoq: Kujataani naasut inangerneqartut

Kujataani naasut naaffissalerngusaannerat ingerlaleruttorpoq, tassami naasup tungujortunik sikkertartup lupiinip nunap nammineq naasui narsaamanerni ingiaraluttuinnarpaat. 

Naasunik orpinnillu ilisimasallip ilaanni lupinit kusagiummerlugit aalajangerpoq Kujataanut eqqunniarlugit. 

Aasaq kialluaraangat lupiinit ima siaruaatsigisarput allaat naasut allat naaffissaaleqilersarlutik. 

Ingammik Qaqortumi lupiinit naasut naaffigisinnaasaanni amerlanerni sikkersutik tungujortut nittarsaattutullusooq ajugaasimaarpaluutigalugit siaruaassimapput. Lupiinit taama annertutigisumik siaruaannerat innuttaasut ilaasa qatsutivippaat. 

- Ilaasa kusageqaat, kisianni qatsuttarpaat. Uanga massakkut kusagiunnaarpakka. Nunatta naasui kusagineruakka, Gert Hansen Qaqortormiu oqarpoq.

Upernaviarsummi ikkuppakka. Inuit takugamikkit pisiariumalerpaat, taamaammallu uanga pisuuvunga, Poul Bjerge illarlunii oqarpoq.

Louise Jacobsen aamma naasumik kusaginningaarami ataatsimik Eqalugaarsunnut nuussivoq illumilu silataanut ikkullugu, sunaaffa kingornatigut peqqissimissutigisassaminik.  

- Ikkukkatsigu soorunami kusageqaarput, aappaaguanili paasivarput sorlai siaruaassimasut allaat naasut allat ingiarlugit, Louise Jacobsen oqarpoq nangillunilu taamanerniilli sorlaajaasalersimalluni.

Lupiinip unammillertitaava

Innuttaasut ilaat isumaqarput lupiinip eqqussap siaruartupiloornera killilerneqartariaqartoq, taamalillunilu naasut naaffissalerngusaannerat allaanerusumut sangutinneqarpoq, tassa innuttaasut tungortumik sikkernillip killilersornissaa sulissutigilermassuk.  

- Kipigaanni ipisarput, taamalu ajuallattarlutik. Eqqatsinni naagaangata peertarpakka, Gert Hansen oqarpoq..
Naasunik orpinnillu ilisimasalik Upernarviarsummi pisortaasimasoq Poul Bjerge 1970-ikkunni  lupiininik Alaskameersunik Islandimiit eqqussisuuvoq.  

- Upernaviarsummi ikkuppakka. Inuit takugamikkit pisiariumalerpaat, taamaammallu uanga pisuuvunga, Poul Bjerge illarlunii oqarpoq. 

Aamma nammineq isumaqarpoq amerlavallaalersimasut. 

- Amerlavallaaqaat. Immaqaana Kalaalit Nunaata saanngutaa iluarivallaaraat, oqarpoq. 

Lupiinit sorlakkaajupput siaruaatipallattarlutillu. Kisianni naasut killilerneqarsinnaalluarput, nassuiaavoq. 

- Nutaaliornerit piiginnaraanni toqusarput, Poul Bjerge oqarpoq.

KNRimut saaffiginninneq naapertorlugu lupiinit aamma Narsamut siaruaassimapput.