Kurz taassumalu partiia Østrigimi qinersinermi ajungaasut
Østrigimi konservativit partiiat OeVP qinersinermi ajugaavoq.
Østrigimi forbundskansleriusimasoq, Sebastian Kurz taassumalu partiia sapaatiummat qinersisoqarnerani qinersisut 37 procentiinit qinerneqarput, AFP allappoq.
Naak naalakkersuisuni partiip allap ’Frihedspartiip’ Ibiza-gatemi ileqqorluuteqarnera pissutigalugu Sebatian Kurzip naalakkersuisuutitarisimasai maajip qaammataani tunuartinneqarsimagaluartut qinersinermi maanna ajugaapput.
Naalli Kurzip qinersinermi ajugaanera ersarilluaraluartoq taassuma naalakkersuisunik nutaanik pilersitsiniarnissaa unammillernarsinnaassaaq, AFP allappoq.
AAMMA ATUARUK Østrigip inatsisartuisa kansleri Kurz tunuartikkaat
Qinersinermi allamik aamma qinerneqangaatsiartoqarpoq. Silap pissusiata ajornartorsiutaanera pinngortitamut attanneqarsinnaasumik ingerlatserusuttunut ’Det Grønne Parti’-mut aamma siuariartitsivoq. Det Grønne Partilli konservativet tunngavigisaanni allanngortitsisoqarnissaa piumasaraat, taamaammat suleqatigiinniarnissaat unammillernarsinnaavoq.
Frihedspartiip qinerneqarnera 10 procentpointimik kinguariarfiuvoq, taamaammat periarfissaaqqissagunanngilaq. Østrigimilu socialdemokraatit aamma kinguariarput, partiillu akulliit peqataatillugit naalakkersuisoqalernissaa ilimananngitsoq AFP allappoq.
AAMMA ATUARUK Østrigimi kanslerip tullersortaa tunuareersorlu qinersinissaq tullinnguuttoq