Østrigip inatsisartuisa kansleri Kurz tunuartikkaat
Partii FPÖ kusanaatsuliortoqarnerata kinguneranik Kurzimit naalakkersuisunit ullualunnguit qaangiutiinnartut tunuartitaareerluni Kurzimik tatiginnikkunnaarnermik taaseqataammat, kansleri tunuartinneqarpoq.
2017-imi videoliap tyskit aviisiitigut maajip 17-iani saqqummermat kusanaatsuliortoqarsimanera erserpoq.
Kanslerip tullersortaa FPÖ-meersoq Heinz-Christian Strache kingornussinerminit aningaasaatilissuunerartumik ruslandimeersumik Spaniap qeqertaani Ibizami isertortumik naapeqateqartoq videoliami takuneqarsinnaavoq.
Tassani Strache naalakkersuisunngussappat kingornussisuunerartup ruslandimeersup sanaartornissamut isumaqatigiissutinik neqeroorfigineqarnissani anguniarlugu partiimut talerperliunerusumut FPÖ-mut aningaasarpassuarnik tunniussinissamik neqerooruteqarpoq.
Østrigimi videoliortoqarneranit qaammatit pingasut qaangiuttut qinersisoqarmat, FPÖ naalakkersuinut ilaalerpoq.
Strache videop saqqummernerata aqaguani tunuarpoq, videolu kanslerimut Sebastian Kurzimut, kanslerillu naalakkersuisuinut maanna kinguneqarpoq.
Østrigip præsidentia kanslerimik naalakkersuisuugallartunut qinersisoqarnissaata tungaanut siuttuusussamik maanna toqqaassaaq. Septembarimi qinersisoqarnissaa ilimagineqarpoq.