Kunngissat: Nuanneqaaq, tupinnaqaaq, ilikkarnaqaaq
- Ilisimatusarfik Neem sermersuarmiittoq pulaarlugu paasisaqarnaqaaq, Norgep kunngissaa Haakon oqaluttuarpoq. Aamma Sverigep dronningissaata angalaqataanini nuannareqaa.
- Tupinnaqaaq ukiut 120.000-it matuma siornagut silap pissusaata qanoq issimanera sermersuarmi assaanikkut paasineqarsinnaammat, kronprinsesse Victoria angerlamut apuunnermini oqarpoq.
Kunnginngortussat Nunani Avannarlerneersut taakku pingasut Svalbardimut siorna tikeraarput. Aamma tassani avatangiisit silallu pissusaata allanngoriartornerat immikkut sammineqarput. Taamaattumik sammisat taakku ingerlateqqinniarlugit kunngissaq Frederik aalajangersimavoq angalanerni taamaattuni Nunarput takuniarneqartariaqartoq.
- Avatangiisit aamma silap pissusaata mianerisariaqarnera pillugit paasisaqaqaagut. Uagut aatsaat tamakkua paasisaqarfigilerpavut. Ilisimasassalli tamakkua meeqqatta ilisimasassaannut nalinginnaasunut ilaassapput, kunngissaq Frederik oqarpoq.