Kunngissat angalanerannit atuakkiaq saqqummerpoq

- Allannguutit amerlagaluartut, inuunermi atukkavut assigiipput. Nunarsuaq ataasiinnaavoq, taannalu tamatta avittussaavarput, Norgimi kunngissaq, Haakon, atuakkami oqarpoq.

Norgimi, Sverigimi Danmarkimilu kunngissat peqatigiillutik issittumut angalanerat atuakkami oqaluttuarineqarpoq, avatangiisillu atuakkami qitiutinneqarput, angalanerup pineraniit annertunerusumik.

Atuakkami allaaserisat kunngissakkunnit allataapput, aammali ilisimatusartut, Svalbardimut Nunatsinnullu angalaqataasut, allaqataallutik. Atuagaq kusanaqisunik nuannersunillu aamma assitalersugaavoq, avatangiisinillu eriaginninnerput assini takuneqarsinnaalluarpoq.

Kunngissaq Frederik atuakkami ima oqarsimanerarneqarpoq: - Silap pissusaata ataatsimut aaqqissuussaanera uagut inuunitsinni inummit kimilluunniit paasivinneqarsinnaagunanngilaq. Qularutissaanngilarli silap pissusaa malunnartumik allanngoriartormat, nunarsuattalu kissakkiartorneranut inuit pisooqataapput. Kiatsikkiartornerullu anikillineqarnisaa aamma pisussaaffigaarput.

Atuakkanik naqiterisitsisarfiup Lindhardt og Ringhofip atuagaq saqqummersippaa, Naalagaaffiit Peqatigiit qullersaat, Kofi Annan siulequtsiisuulluni.