Kunngissaq Tunumi ullumi tikeraarpoq
Ilimatusarfigineqartut Aage V. Jensenip Aningaasaateqarfiisa VILLUM FONDEN-illu aningaasanik tunissuteqarnerisigut piviusunngortinneqarsinnaasimasut Kunngissap atoqqaartissussaavai.
-Aage V. Jensenip Aningaasaateqarfiisa VILLUM FONDEN-illu taama annertutigisumik tunissuteqarnerisigut Kalaallit Nunaata avannaata kangisissuani ilisimatusarfissanik nutaanik nutaaliaasunillu pilersitsisoqarsinnaalerpoq. Nunarsuup silaannaanut sunniuteqartut silap pissusaatalu allanngoriartornerata issittumi uumasunut, kemimut fysikkimullu sunniutaanik ilisimatusarfiginissaannut ilisimatuut pitsaalluinnartunik periarfissaqalissapput. Aarhus Universitetimi ilisimatuut kisiisa ilisimatusarfinnik atuissanngillat, aammali nunarsuarmi tamarmi suleqatigisatta atussavaat, Århus Universitetimi rektori Lauritz B. Holm-Nielsen oqarpoq.
Kunngissaq ministerit Nick Nielsen Nunatsinneersoq Morten Østergaardilu Danmarkimeersoq peqatigalugit Station Nordimi nunarsuarmi ilisimatusarfiit avannarpasinnersaata sanaartornissaanut nivariaqqaassaaq. VILLUM FONDEN-ip tunissuteqarneratigut aamma taama avannarpasitsigisumi sanaartornissaq piviusunngortinneqarpoq. Sanaartorneq 2014-imi naammassineqartussatut naatsorsuutigineqarpoq, tamatuma kingorna Namminersorlutik Oqartussanut tunniunneqassalluni. Ingerlanneqarnera Århus Universitetip siunissami isumagissavaa.
-Aarhus Universitetip ilisimatusarfik immikkuullarissoq nutaaliaalluinnartorlu - Villum Research Station - atorlugu ilisimatuunit nunarsuarmit tamarmeersunit silap pissusiisa allanngoriartornerannik ilisimatusarnermut atorneqarnissaa VILLUM FONDEN-imi neriuutigalugulu qilanaarivarput, VILLUM FONDEN-ip siulersuisuini siulittaasoq Lars Erik Kann-Rasmussen oqarpoq.
