OL-ip Danmarkimi 2024-mi ingerlanneqarnissaanut politikkikkut oqallinnermut Kunngissaq Frederik maanna akuliuppoq. Aviisi Jyllands-Posten taama allappoq.
Danmarkimi Olympiadertoqarnissaanik isumassarsiaq Aningaasaqarnermut Danmarkimi ministerip, Thor Pedersenip, sapaatip akunnera kingulleq itigartilluinnarpaa. – Tamanna piviusunngorsinnaanngilaq, Aningaasaqarnermut ministeri ilaatigut oqarpoq. Taamali oqarneq Kunngissap maanna tassa akuliuffigaa, OL-immi Danmarkimi pinissaa Kunngissap tapersersorluinnarpaa.
- Eqqarsaat alutornartuuvoq kusanarluinnarluinnarlunilu, OL-ili immaqa danskerpalaanngikkaluarpoq. Danskerpalaartunngortissinnaassavarpulli, Kunngissaq ippassaq oqarpoq.
Kunngissaq IOC-mut, International Olympic Committé-mut, tassa Nunat tamalaat olympiadernermut ataatsimiititaliaanut ilaasortanngorniarluni ukiarmi nalunaarpoq, aatsaavissuarli politikkikkut akuliulluni.