Kunngissaq Frederik Christiansborg Slotip aneerasaartarfianit Kong Frederik X-itut januarip 14-iani nalunaaqutaq pingasut suaarutigineqassaaq.

Kunngikkormiut nittartakkaminni taama paasissutissiipput.

Ulloq taanna Christiansborg Slotimi nalunaaqutaq marlunut naalagaaffimmi siuttut siunersioqatigiissapput. Naalagaaffimmi siuttut siunersioqatigeereernerata kingorna ministeriunerup Mette Frederiksenip (S) kunngit nikinnerat Christiansborg Slotimi saqqummiutissagaa, Ministeriuneqarfiup siusinnerusukkut nalunaarutigaa.

Naalagaaffimmi siuttut siunersioqatigiinneranni ministeriunerup ministerillu sinnerisa dronningi ataatsimeeqatigissavaat, januaarillu 14-iata kingorna kunnginngortoq ataatsimeeqatigisalissallugu.

Ukiuni 52-ini dronningiusoq

Siunersioqatigiinneq kunngip imaluunniit aallaqqanerani sinniisuata siunersioqatigiinneq aquttarpaa. Siunersioqatigiinnermilu tassani kunngip ministerillu inatsisit Folketingimi akuersissutigineqartut atsiortarpaat.

Siunersiuinermittaaq tassani naalakkersuisut Folketingimi inatsisissatut siunnersuutiginiakkaminnik kunngimut ilisimatitsissuteqartarput. Siunersiueqatigiinnermi aalajangiisoqarneq ajorpoq. Nalliuttorsiorpalaarnerullunili.

Dronning Margrethep Danmarkimi kunngitut ukiuni 52-ni atuutereerluni tunuarniarnini ukiortaamut oqalugiaammini naggasiutitut oqaatigaa.

Kunnginngortitsisoqarnissaanulli paasissutissat tamarmik suli ilisimaneqanngillat. Kisianni naalagaaffimmi siuttut nalunaaqutaq marlunut siunersioqatigiinnissaaq, kunngillu nutaap januaarip 14-iani nalunaaqutaq pingasut suaarutigineqarnissaa paasissutissani nutaajupput.