Kunngissaq ICC-p ataatsimeersuarnissaanut illersuisunngorpoq

Naggueqatigiit Inuit suleqatigiiffiat, ICC, ukiut sisamakkaarlugit ileqquusumik ataatsimeersuartarpoq, Nunarpullu ukiut aqqanillit matuma siornagut kingullermik ataatsimeersuarfiuvoq. ICC-p aasaru ataatsimeersuarnissaa aamma nalliuttorsiorfiusussaavoq, tassami naggueqatigiit Inuit alaskamiut, akilinermiut, tjukotkamiut kalaallillu suleqatigiinnissamut tunngaviusumik isumaqatigiissutaat, Nuummi 1980-imi atsiorneqartoq, ukiunik 30-nngortorsiorlugu nalliuttorsiutigineqartussaammat.

Nunatsinni naalakkersuisut siulittaasuat, Kuupik Kleist, aamma borgmester Asii Chemnitz Narup, Kommuneqarfik Sermersooq, Nunatsinnilu ICC-p siulittaasua, Aqqaluk Lynge, pisortatigoortumik nalliuttorsiuutigaluni juunip ulluisa 28-anniit juulip ulluisa aappaata tungaanut ataatsimeersuarnissami qaaqqusisuussapput.