Kunngissaq Frederik Beijingiliarusuppoq
Kinami Beijingimi OL-ertoqalerpat, kunngissap Frederiup peqataannginnissamik kajumissaarneqarnini malinnianngilaa. Kunngissaq Frederik ministeriunermit Anders Fogh Rasmussenimit tamanna pillugu tapersersorneqarpoq.
Allattoq Mads Lynge
Tuluit kunngissaat Prins Charles Beijingimi OL-imi unammersuartoqalerpat takkuniarnani nalunaarpoq. Kunngissap Frederiup OL-imi unammisoqalerpat angerlarsimaannarnissaanik partii SF kajumissaarivoq.
Timersornerup naalakkersuinikkullu isummertarnerup immikkoortinneqarnissaat ministeriunerup Anders Fogh Ramussenip tusagassiortunik ippassaq katersortitsinermini erseqqissarpaa.
OL-ertoqarnerani Danmark timersortartunik peqataatitaqartussaavoq, kunngissarlu Beijingimi peqataassanngippat eqqumiippallaassaq, Anders Fogh Rasmussen oqarpoq.