Kunngissap ujakkaarluni ooqattaasarnermut ilinniartinneqarnissaa Øysteinip ammaffigaa

Ujakkaarluni ooqattaasarneq kunngissap Frederiup soqutigisaraa. Ujakkaarlutik ooqattaasartartut Vancouverimi ukiuunerani OL-eqarnerani unammiuaarfiat kunngissap Frederiup alakkarusukkaa, Kalaallit Nunaat sinnerlugu unammigiartup Øystein Slettemarkip oqaatigaa.
Allattoq Mads Lynge
februaarip 13-at 2010 13:38

Ujakkaarluni ooqattaasarnermi sungiusaasut timersuut taanna kunngissamut ilisaritinniarpaat, Øystein Slettemarkilli kunngissaq suli naapissimannginnerarpaa:

- Naagga, suli naapinngilara, ujakkaarlunili ooqattaasarneq soqutigilluinnarpaa, unammiffimmullu alakkaannissaa qilanaaraarput. Ooqattaasarnissarmi kunngissap kissaatigisimavaa, Øystein Slettemark oqarpoq.

Ujakkaarluni ooqattaasartartut nunarsuaq tamakkerlugu kattuffianni præsidentip periarfissat suunersut maanna paasiniaaffigileruttorpai, unamminerillu nalaanni sungiusaasut peqatigalugit ooqattaasartarfiup eqqaani unammisunik malinnaasinnaanissaa aamma aqqutissiuunniarneqarluni.

Kunngissaq Frederik ujakkaarluni ooqattaasarnissamut ilinniartinneqassanersoq Øystein Slettemark aperaarput, periarfissaqassagunilu taamaaliorusussinnaanerarluni.

Øystein Slettemark siullerpaamik aqagu unammissaaq, 10 kilometerimut unamminermi peqataassagami.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq