Kunngissap OL-komite-mi ilaasortanngorniarnera ernumagaat
Kunngissap Frederiup nunat tamalaat olympiadernermut ataatsimiititaliaani ilaasortanngorniarnera Danmarkimi naalakkersuinermik suliaqartut arlallit ernumanartoqartippaat.
Folketingimi ilaasortaatitarput Kuupik Kleist ernumasunut ilannguppoq. Kunngissap akunnaatoorutigisinnaasaasa ilaat pillugu ima oqarpoq:
- Kunngissaq qanoq kalaallinik nuannarinnitsigisoq tamatta nalunngilarput taamaattumik kalaallit olympiademi unammeqataaniarlutik qinnuteqartarnerini akuersaartarnissaa ilimagivara, Kuupik Kleist oqarpoq.
Naalakkersuinermik suliaqartut suliassaannut taamaalilluni Kunngissap akuliuttarnissaa ilimagineqarpoq.
Naluneqanngitsutut Kalaalllit Nunaat nammineq erfalasuni atorlugu 2010-mi Vancouverimi ukiukkut OL-eqalerpat ujakkaarluni uukattaasarlunilu unamminerni peqataatitaqarusuppoq.
Kunngissap Frederiup ilaasortanngorniarnera Kuupik Kleistip qularnartoqartippaa:
- Kunngissaq naalakkersuinermik suliaqartut suliaannut akuliuttassanngippat ilaasortanngornissaa nuannaarutigaarput. Nunat tamalaat olympiadernermut ataatsimiititaliaani aalajangigassat naalakkersuinermik suliallit suliaannut attuumassuteqartartorujussuusut naluneqanngilaq. Kunngissaq ilaasortanngussagaluaruni aalajangiiffissat ilaat eqqarsaatigilluartassagai qularinngilara, Kuupik Kleist oqarpoq.
