Kunngissakkut kalaaliaqqanut ikiuunnialerput
Millioni koruunit sisamararterutaat, siunertanut pitsaasunut atorneqartussatut frimærkip nalinganut ilassutillip 2006-imi tunineqarneranit isertitat, Kunngissamut nulianullu Marymut ippassaq tunniunneqarput, aningaasallu taakku Kalaallit Nunaanni meeqqat atugaasa pitsanngorsaatissaannut tassa atugassanngortinneqarput.
Frimærkip assiliartarai Kunngissakkut kusanaqalutik kalaallisoortut, qungujulaqalutillu aalaterisut. Asseq Leiff Josefsenimit assilisaavoq, ilusilersornera ilioqqarneralu Dorit Olsenimit suliaalluni.
Siunertanut pitsaasunut atorneqartussatut frimærki 2006-imeersuuvoq, frimærkilu ataaseq pisiarigaanni 50 oorimik ilassutitaqarluni. POST Greenlandip ilisimatitsinera naapertorlugu frimærki Kalaallit Nunaanni nunarsuarmilu pisisartut katersisartullu akornanni assorsuaq nuannarineqarsimavoq.
- Frimærki Kunngikkormiutut Ataqqinassusillit, Kunngissap Kunngissallu nulianik assitalik, Kalaallit Nunaanni frimærkip nalinganut ilassutitalinni ukiuni kingullerpaani nuannarineqarnerpaasimavoq, allakkerinermut pisortaq, Per Svendsen, oqarpoq.
Checki millioni koruunit sisamararterutaannik nalilik allakkerinermut pisortamit, Per Svendsenimit, aamma frimærkinik tuniniaanermut pisortamit, Allan Pertti Frandsenimit, Amalienborgimi persuarsiorpalaarpallaanngitsumik naapeqatigiinnermi ippassaq tunniunneqarpoq.
