Kunngimut ajuallannartuliorami ukiut qulit parnaarusaassaaq
Thailandimut feeriarniarlutit pilersaaruteqaruit, taava taqqavaniitillutit kunngimut ajuallannartumik iliuuseqarnissat mianersuutigisariaqassavat.
Takornariaq Schweizimiu kunngimut ajuallannartumik iliuuseqarsimasutut ukiut qulit parnaarussassatut eqqartuunneqaqqammerpoq.
57-inik ukiulik Oliver Rudolf Jufer decembarimi, illoqarfimmi Chiang Mai-mi Thailandip Avannaaniittumi tigusarineqarpoq. Tigusarineqarneranut patsisaavoq kunngip 79-inik ukiullip Bhumibol Adulyadej-ip assinginik arlalinnik seqqitsaalluni aalakooqaluni qalipaasaqattaarsimanera. Kunngi Thailandimiorpassuarnit qilammiorpalaartutut isigineqartarpoq.
Tassa maanna taamaaliorsimanini pissutigalugu ukiut qulit parnaarussassanngortinneqarpoq. Tassa oqartoqarsinnaavoq parnaarussaanissani sivikinaaraa. Tassami Schweizimiu takornariaq taanna aallaqqaammut ukiut 20-t parnaarussassanngorlugu pineqaatissinneqaraluarpoq, kisianni eqqartuussisup Juferip pineqaatissinneqarnera sivikilliniarlugu aalajangersimavoq, matumani nassuersimanera patsisaatinneqarluni.