Kunngikkunnik nuannarinnittoq: Taasinerup inernera nuannaarutigaara

Kunngissaqarneq pillugu inatsisip allannguutissaatut siunnersuut ippassaq taasisitsissutigineqarmat, nunatsinnit taasisartut 22 procentii taasipput, taakkunannga 92 procentit inatsimmik allannguinissamut angerput. Kunngikkormiunik soqutigisaqartup Ruth Holmip taasisitsinerup inernera nuannarilluinnarpaa.
juunip 08-at 2009 10:56

- Nuannaaqaanga qujasupilussuullungalu Kalaallit Nunaanni taama amerlatigisunik taasisoqarmat. Danmarkimut naleqqiullugu angertut amerlanerummata, Ruth Holm oqarpoq.

Namminersornerup eqqunneqarnissaa pillugu taasisoqarmat innuttaasut 60 procentii angerput. Kunngissaqartarneq pillugu inatsisip allanngortissaanut siunnersuut ippassaq taasissutigineqarmat taasisut 92 procentii angerput.

- Namminersulernissaq angeratsigu aamma qujanartorujussuuvoq, aamma angajoqqaagut peerutereersut inuugallaramik oqartarnikuupput 'kalaallit nammineq sapinngillat', Ruth Holm oqarpoq.

Nunatsinni Ippassaq taasisitsisoqarnerani inuit 8.686-it taasiartorput. Taakkunannga 630 akerliullutik. Taamaalillutik nunatsinni angerlutik taasisut procentinngorlugit naalagaaffeqatigiit iluanni amerlanersaapput.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq