Kunngikkunni arnat angutillu naligiissitaalissapput

Nunatsinni taasisinnaasut 22 proventii taasiartorsimapput, taakkunanilu akuersaarlutik taasisut Kunngeqarfik tamakkerlugu amerlanerpaanerat tulluusimaarutigisinnaavarput.

Maani Nunatsinni taasisunit 8.686-iusunit 92,6 procentit kunngikkut meeraanni nukappiaqqat niviarsiaqqallu naligiissitaanissaat akuersaarneqarpoq, Nunatsinni akerliullutik taasisut 630-upput, tassa 7,4 procentit.

Inatsisit tunngaviusut allanngortinneqarnissaannut taasiartortut 77,5 procentii Danmarkimi akuersillutik taasipput. Aamma taasiartorluartoqarneratigut, inatsisip allanngortinneqarsinnaanissaanut, taasisinnaasut ikinnerpaamik 40 procentiisa akuersinissaannik piumasarineqartoq qaangerneqarmat, taasisitsineq atortussaatinneqarpoq.

Savalimmiuni taasisinnaasut 12 procentiinnaat taasiartorsimasut maani taasiartortut 22 procentiupput.

Taasisitsinerup inernera ippassaq unnuap qeqqa sioqqullugu nalunaaqutaq 23.45 Rigsombudeqarfimmit nalunaarutigineqarpoq.