Kunngikkormiutut ataqqinassullip Prins Henriup katersaataanik tillinniarneq
Juulip 9-aani Katuami kunngikkormiut katersaataannik tillittoqarsimanera politiinut nalunaarutigineqarpoq.
Tillinneqartoq tassaavoq aarnuaq Ataqqinartorsuup Dronning Margrethep uiatalu kunngikkormiusut ataqqinassusillip Prins Henriup saqqummersitsinermut atukkiussimasaat.
juulip 11-at 2013 13:00
Aarnuaq tassaavoq nannup kukii aarrullu tuugaavinik akusaalluni.
Tilittut juulip qulingani tigusarineqarput, unnerluussassanngortinneqareerlutillu.
Aarnuarli suli nassaarineqanngilaq, tillittulli paasissutissiineri naapertorlugit aarnuaq taanna Nuup qeqqani angut qallunaajussangatinneqartoq 50-llu missaani ukioqassangatinneqartumut tunisimanerarpaat.
Taamaammat angut taanna politiit assorsuaq attaveqarfigerusuppaat, taannami pisuni pingaarutilimmik ilisimannittuusutut inissisimavoq, soorunalumi aarnuaq kunngikkormiunut uterteqqinneqarniassammat.
