Kunngikkormiut naligat kisinneqarpoq
Kunngikkormiunut aningaasartuutit ukioq kingulleq 243 millionit koruuniusimapput.
- Akiminullu naleqqulluarpoq. Statsministeri Lars Løkke Rasmussen tusagassiortunik katersortitsinermini taama oqarpoq.
- Kunngikkormiut inuiaqatigiinnit atorneqarnerat, soorlu inuiaqatigiinni ataqatigiissitsisinnaanerat, inuiaqatigiinnit pingaartinneqarnerat, nunanullu allanut niuernitsinni kunngikkormiut iluaqutaalluarnerat, Danmarkimummi tikeraarusulersitsisunut ilaasarmata, eqqarsaatigalugu akiminnut naleqqulluarput, Lars Løkke Rasmussen taama oqarpoq.
Kunngikkormiunut toqqaannartumik aningaasartuutit 97 millionit koruuniusimapput. Tassa aningaasat kunngikkormiut nerisassaannut sulisuinullu atugassaat. Ministeriaqarfiilli assigiinngitsut toqqaannanngikkaluamik aamma kunngikkormiunut aningaasaliisarput, taakkulu ukioq kingulleq 244 millionit koruunisut annertutigisimapput. Kunngikkormiut hiistii gardehusarregimentimiittut 43 millionit koruuninik aningaasartuutigineqarsimapput, kunngikkormiut paarsisuilu, livgarden, aningaasartuuteqarnerpaasimapput, 48 millionit koruuninik aningaasartuuteqarsimagamik. Statsministerili naapertorlugu Danmarki kunngiitsuuffiusuuguni aningaasartuutinik sipaarsimassanngikkaluarpoq.
- Kunngikkormiut inuiaqatigiinni oqaluttuarisaanerup ingerlanerani inisissisimanerat nallerniarlugu præsidenti assigiinngitsunik annertunernik ilisarnaasersorsimassagaluarpoq, statsministeri oqarpoq.
