Kunngikkormiut angalanernut aningaasartuutaat isornartorsiorneqarput
Angalasarnerat 2002-mili 21 millionit koruuninik akitsoreersimavoq. Maannalu ukiumut 47 millionit koruuneqalersimasoq, aviisimi B.T-mi allaaserineqarpoq.
Kunngikkormiut umiarsuaat Dannebrog aningaasartuutaanerpaavoq. Umiarsuaq taanna ukiunik 80-inik pisoqaassusilik atorlugu Nunatsinni qanittukkut aamma angalaarput, pingaartumillu angalaneq taanna aningaasartuutaaqaaq.
Dannebrogip ingerlanneqarneranut 2010-mi aningaasartuutit 35,6 millionit koruuniupput. Ukiut sisamat matuma siornagumut naleqqiullugit 10 millionit koruuninik amerleriarsimapput, taamanikkut 25 millionit koruunit missaanniissimallutik.
Illersornissamut ministereqarfiup naatsorsuutaani kisitsisit takuneqarsinnaapput, kisitsisillu taakku aviisip B.T-p takunnissinnaanermut uppernarsaammik pilluni takusinnaanngorsimavai.
Angalanermi aningaasartuutit Illersornissamut ministereqarfimmit ukiut tamaasa akilerneqartarput, 97 millionit koruuninullu kunngikkormiut naalagaaffimmit ukiumoortumik pisartagaannut attuumassuteqaratik.
Angalanermut aningaasartuutit isornartoqartorujussuupput, inuit aviisip B.T-p oqaloqatigisaat arlallit oqarput.
- Kunngikkormiut sipaartariaqarput, soorlu uagut aamma sipaartariaqartugut suliassaqarunillu namminneq akiliisariaqarput. Aningaasaqarnikkut ajornartorsiorneq taama annertutigisoq atoreerlutigu ingasaassinaveersaartariaqarpugut, SF-imi illersornissaq pillugu oqaaseqartartoq, Jonas Dahl, oqarpoq, taamalu oqarnera Folketingimi ilaasortanit arlalinnit taperserneqarpoq.
