Kulusumi mittarfik aputaajaatinik nutaanik pisariaqartitsivoq

Kulusumi apinerujussua pissutigalugu Kulusumi mittarfik ippassaq matuvoq, sisamanngornerullu tungaanut matoqqanissaa aalajangiunneqarluni.
Allattoq Jaaku Lyberth
novembarip 05-at 2008 06:08

Mittarfiup ukiukkut matoqqakulasarnera tunumi inuussutissarsiutitigut ingerlataqartut qisuariarfigaat.

Kulusuup mittarfiani aputaajaanermut atortut nutaanngilillutik naammattumik atorneqarsinnaannginnerat pissutaallutik, mittaarfik akulikitsumik matuneqartariaqartarpoq inuussutissarsiutinik ingerlataqartut sinnerlugit Jakob Abelsen allappoq.

Kalaallit Nunaanni mittarfeqarfiit akissakilliornerat pissutaalluni, Kulusumi aputaajaanermut atortunik nutaanik pissarsisinnaasimanngilaq.

Apinerulerpat Kulusumi mittarfik sivisunerusumik matoqqasalersinnaavoq, tamannalu tunumut attaveqartarneq mattulluinnarneqarsinnaaneranik kinguneqarsinnaavoq, tamannalu tunumi innutaasunit akersaarneqarsinnaanngilaq, Jakob Abelsen allappoq.

Naalakkersuisut taamatullu Kalaallit Nunaanni mittarfeqarfiit kajumissarneqarpoq, aaqqissuutissamik nassaaqqullugit, tunumi innuttaasut mattulluinnaqqissaarneqassanngippata.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq