Kulusumi mingutsitsineq nalunaarutigaat
Kulusuup mittarfeqarfiani solaari 100.000 liiteringajak nunami immamilu mingutsitsisoq takornariat arajutsisimanngilaat.
Uuliaarluerneq juunip ulluisa tallimaanni Kulusummi mittarfeqarfiup pisortaata politiinut nalunaarutigaa, orsussarlu qaammatini marlussunni aniarusaarsimasoq politiit sinnerlugit – qatserisartut pisortaat peqatigalugu – ajutoorfimmik ippassaq alakkaasimasoq, vicepolitikommissær Michael Poulsen oqarpoq:
- Helikopterimik imaq qulaaqqullugu takuneqarsinnaavoq, sumi tamaani uuliarasaartoq, saattunnguamik immap qaava qillernertarasaarluni. Sineriak aamma solaarerasappoq. Tikillugu misissoratsigu takusinnaavarput ujaqqat, qaarsut nunalu solaarimik qallersimasut.
Uumasunilli toqungasunik takusaqanngilagut, Tasiilami politiinit Michael Poulsen taama aallartippoq.
Kulusummi Nunaqarfimmi aqutsisut siulittaasuat Pele Maratse oqarpoq, ukiut tamarluinnaasa tankeqarfimmi ajutoortoqartaraluartoq aatsaat taama atsigisumik takulluni.
Takornariat nunarsuarmit tamarmeersut ullut tamangajaasa 40-t 50-llu akornanniittut Islandikkoorlutik Kulusummut tikittarput, taakkulu mingutsitsineq arajutsisanngilaat.
-Taamaattoq tupiginngilara takornariat nammineerlutik takunnikkaangamik apeqqutigisarmassuk immamiittoq sunaanersoq. Soorunami ilisimatittarpagut uuliaasoq, kisianni annertunerusumik erseqqissaaviginagit, nassuiaavoq.
- Aatsaat taama annerutigisumik mingutsitsisoqarpoq, talittarfiup eqqaani eqqaaveqarfeqarpoq assigiinngitsunut igitsisartoqarluni aamma tankeqarfiuvoq, mittarfiup nammineq tankerisaanik, sissamut qanittuaraararsuit.
- Ukioq mannaannaq solaaruuliamik mingutsitsisoqanngilaq, aamma ukiut kingulliit taamatut pisoqaqattaartarpoq. Arlaatigut gasolie takkuttarluni, soornami taama annertutiginngitsoq, ksianni aatsaat taama annertutigisoq siumorneqarpoq maangaannarsimasoq.
Taamaammat Pele Maratse isumaqarpoq suliffeqarfik nakkutigineqarnerusariaqartoq. Politiit takuniakkatik tunngavigalugit nalunaarusiorput.
-Uuma nalunaarusiap suliarisama assilinera Avatangiisinut Pinngortitamullu Pisortaqarfimmut nassiutissavara. Aamma ilisimatereerpagut qanoq pisoqarsimaneranik. Nalunaarusiatsinni qanoq iliornissaanik innersuussummik ilanngussaqassaagut, Tasiilami vicepolitikommissær i oqarpoq.
Innersuussut qatserisartut pisortaat Henrik Andreassen peqatigalugu suliarineqarpoq.
-Innersuussutigissavarput, nunamik solaarerasattumik qalluinissaq saliinissarlu. Immamiittorli qanoq iliorfigiuminaappoq, pingaartumik sikorsuit takkusimaalernerat eqqarsaatigalugu.
Tassa imaappa aalannguunnissaa utaqqiinnassagissi, aperaarput.
- Aap, solaari taamaattarpoq, aalannguuttarpoq. Ajornartorsiutaassaarli solaari sissamiittoq, katersoruminaassaqigami, akivoq.
Avatangiisinut tunngatillugu pisoq ajunaarnersuartut taaneqarsinnaanerluni, apereqqipparput.
- Naamik, soorunami solaari aniasimasoq annertoqaaq, kisianni uumasunut ajunaarutaanngimmat, pisoq pisuusoqarani ajutoornertut isigaarput - nivattaassuimmi solaarinut immiissummik piaarinatik apuisoorsimanerannik peqquteqarpoq, Michael Poulsen naggasiivoq.
Politiit qatserisartullu takusatik tunngavigalugit nalunaarusiaat Avatangiisinut Pinngortitamullu Pisortaqarfimmut ullumi nassiunneqassaaq. Tigoriarpassuk Kulusuup mittarfiani eqqaanilu qanoq pisoqassanersoq naliliisoqassaaq.
