Kulturisiorneq Nunanut Avannarlernut ingerlaassaaq
Aarhus Festugep ukiuni kingullerni pingasuni aalajangersimasunik nipilersortartorai ’The DeSoto Caucus, Taakkua Festugeqarnerani unnunni pingasuni tulleriiginnarni nipilersortartunik nunani allamiunik nipilersoqateqartarput. Taamannamik nipilersornertik taasarpaat "Medium Rare Session" kalaallisuunngoraanni "Tusarneqakulanngingajattut Naapinnerat".
- Medium Rare Aarhus festugeqarnerani pilersinneqarpoq, immikkuullarissumik saqqummiusserusukkatta. Tassalu nipilersortartut maanimiut nipilersortartullu nunanit tamalaaneersut nipilersoqatigiittarput, unnummilu ataatsimi allaalluinnartumik pilersitsillutik. Tassalu nipilersortartut maanimiut uummarissarniarlugit, aammalu tusartakkatsinnit allaanerusumik nipilersornikkut misigisaqarusulluta taamaaliortarpugut, Kulturikkut aaqqissuussinerup pisortaa, Jens Folmer Jepsen oqarpoq.
Nunatsinnut Islandimullu angalanissaq Nive Nielsenip taassumalu angutaataata, Jan de Vroedep - siorna Medium Rare Session-eqarmat nipilersoqataasup, isumassarsiaraat. Isumassarsiarlu Aarhus Festugemik aaqqissuisut tapersersulertorpaat.
- Jan Nivilu apeqqutilliissuteqarmata, soorunami akuersaarpagut, inuit pitsaasut nuannersunik misigisaqarfigisagut suleqatigigutsigit pitsaasumik angusaqarfigisinnaagatsigit, Jens Folmer Jepsen oqarpoq.
Aammami Aarhus Festugep nunarput piukkooruteqarfigaa.
- Kalaallit Nunaat, alutornartorpassuarnik maannakkut pisoqarfiusoq, nakkutigeqqinnaarparput. Aamma Nordatlantisk Forening - Atlantikup avannaa pillugu peqatigiiffik - sorpassuarnik aaqqissuusseqatigisarparput. Erinarsoqatigiinnik, taalliortunik nipilersortartunillu siorna maaniitoqarpoq, aammalu Simon Lynge saqqummertinneqarluni, 2014-p nipilersortartuisut taagukkatsinni - tassa taama taagukkavut ukiut pingasut qaangiuppata nunarsuarmi tusaamasaassasut upperigatsigu.
Reykjavikimeersoq Kimi Records/Havarí aamma Nunatsinneersoq Tuttu Recordings suleqatigalugit nipilersoriarluni Atlantikup Avannaanut angalanissaq aaqqissuunneqarpoq.
Århus Festuge pissaaq aggustip 26-aniit septembarip sisamaanut, qulequtaa kalallisuunngoraanni imaalluni: "Kukkunerit nuannersut iluatsitsinerillu allat".
Tusarnaartitsiartorluni angalanissami pisussat tulleriinneri suli tamanut tusarliunneqanngillat.