Kulturip Unnukkuani atlantikup avannaamiut peqataassapput
Najannguaq Lennert INUIK Design-imeersoq Kalaallit Illuutaanni atisanik nittarsaassissaaq. Aamma Qivioq Kern Kreutzmannip inuusuttut nunani allaniittut pillugit piviusulersaarummik filmiliaa takutinneqassaaq, filmimi tassani kalaallit ilinniartut ilaatigut Islandimiittut Afrikamiittullu malinnaaffigineqarput.
Erinarsoqatigiit Aavaat erinarsorlutillu qilaatersornermik takutitsissapput aamma Ulf Fleischer guitarerlunilu erinarsorniarpoq.
Niels Bohr institutimi sermersuarmi qillerinerit pillugit oqalugiartoqassaaq aamma Dansk Polarcenterimi qimuttumik pattalaarisoqarsinnaavoq ilaatigullu Kujataani qallunaatsiaat illukuinik aasaq assaanernit paasisanik tusagaqartoqarsinnaassalluni.
Illu Atlantikumi qiiaamminarsinnaasunik sammisaqartoqarnerussaaq, Islandimiut qiiaamminartuliaannik tusarnaartoqarsinnaalluni aamma tusarnaartut uaajeertumit iserfigineqariataarnissartik naatsorsuutigisinnaassavaat.
Filmertarfimmi Cinematekimi inuusanik aalasunik filmiliaq nutaarluinnaq Shaman takutinneqassaaq, tassani oqaluttuarineqarluni Uutaaq Københavnimi bussit unittarfianniitilluni nunaqqatimi tupilammit toqorarneqarnerannik, namminerlu qaqqamut qimaanerminik angakkunngornerminillu eqqaasaqalersumik oqaluttuaq.
Christiansborgimi Kalaallit Nunaannut tunngasunut inimi aamma Savalimmiunut tunngasunut inimi politikerit Atlantikup Avannaaneersut naapinneqarsinnaassapput, apeqqutinullu akillorinneqqusaattunut peqataasoqarsinnaassalluni ajugaasorlu nunatsinnut angalanissamik akissarsitinneqassaaq.
