Kulturimut siunnersuisoqatigiinni ilaasortaq nutaaq

Erinarsortartoq Kimmernaq Kjeldsen Kulturip siuarsarneqarnissaanut Siunnersuisoqatigiinni ilaasortassatut kommunalbestyrelsimit ullumi toqqarneqarpoq.

Allattoq Elisa Isaksen

januaarip 26-at 2010 16:59

Taamaalilluni erinarsortartoq ilisimaneqarluartoq taanna, 27-nik ukioqartoq, siunnersuisoqatigiinni Kommuneqarfik Sermersuumi kulturikkut siuarsaallunilu piorsaasussani ilaalissaaq kiisalu kulturikkut suliniuteqarniarluni qinnuteqaatinik suliaqartalissalluni.

Kimmernaq Kjeldsen timmisartumi saqisutut ilinniarsimavoq aamma erinarsortartutut nuannarineqarluartutut ilisimaneqarluni. Ilaatigut cd-mik taaguutilimmik "Kimmernaq -Tunissut" saqqummersereerpaa. Pinnersaasiortutut suliaqartuuvoq aamma tv-kkut isiginnaagassiani atuaasartuusimalluni, ilaatigut qallunaat aallakaatitassiaanni kalaallisut saqqummiisartuusimalluni. Kimmernaq aamma Røde Korsimik avammut nittarsaassisartuuvoq.

Kulturip siuarsarneqarnissaanut Siunnersuisoqatigiit siorna novembarip 17-anni pilersinneqarput, 2010-mullu missingersuutini 3 millionit koruunit sinnerlugit kulturimut tunngasunik suliniuteqarnermi qinnuteqarfigineqarsinnaallutik.

Kulturimut aningaasaliissutit kulturikkut sammisassaqartitsiniarnermi nutarterinermut atorneqassapput aamma kulturikkut suliniuteqartut assigiinngitsut namminersortut, suliffeqarfiit kommunimilu innuttaasut akornanni siuarsaaqataanissamut atorneqassallutik.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.