Kulturikkut nersornaat Inuk Silis Høeghimut tunniunneqarpoq

Inuiattut Ullorsiornermi juunip 21-ani 2015 Kulturikkut Nersornaat Katuami tunniunneqarpoq.

Ukioq manna Kulturikkut Nersornaat Inuk Silis Høeghimut tunniunneqarpoq.

Nersornaaserneqartoq pillugu ilaatigut Naalakkersuisunut ilaasortaq Nivi OIsen imatut oqarpoq: 

- Nuimanianngitsoq, inussiarnersoq, suliaminut tunniusimasoq ataqqisaasorlu – minnerunngitsumik eqqumiitsuliortut akornanni. Naalaarsinnaassuseqartuuvoq, malussarissuulluni sulianilu paasitinniarluartarlugit. Eqqumiitsuliortoq suliaminik ilumoorussisoq suliaminullu tunniusimalluartoq, qaffasissumik suleriaasilik. Tinnerseraallaqqissuuvoq alapernaatsuullunilu, arlalitsigullu suliaasa kingunerisarpaat apeqqutit suli amerlanerit ammaanneqarnerat. Eqqumiitsuliortutut sulinermini – amerlanertigut qungujuutissartalimmik- eqqarsariaatsit pigiliutiinnakkat apeqqusertarpai, periaatsillu assigiinngitsut atorlugit ilaatigut silarsuaq kulturikkut aakkiartortumik taaneqarsinnaasoq misissugarisarlugu.

Naalakkersuisut sinnerlugit Naalakkersuisunut ilaasortaq Nivi Olsen diplomimik nersornaatillu aningaasartaanik tunniussivoq.